家陣經濟唔好，個個買嘢都要諗過度過，格晒價錢至入貨，舖頭開倉就如雨後春笋停不了，想買平嘢重使等季尾？只要識門路，要幾平都有。好似九龍灣工廠區一帶就有好多直銷舖頭，家電、成衣、家具乜都有，最重要係服務一流。掃完貨重可以順便去醫肚，咪以為工廠區冇好嘢食，餐廳、Cafe、食Buffet樣樣齊，行足一日都冇問題。
記者：黃秋燕 攝影：陳穎
ImageGirl：Natalie
好多人想買平嘢都會等到開倉時，但貨品質素未必有保證，老闆話𠵱家競爭大，價平之外服務亦好重要，佢哋直接由代理商取貨，貨品當然有總代理保用，而且佢哋租金平，售價比一般舖頭低，最重要係提供方便及優質服務，只要你睇啱心水，講出型號及牌子就立即向你報價，重可以即日送貨，完全唔使擔心。
雖然款式唔算新，但講明係日本製造，感覺上好似有啲保證，而且佢有齊一般抽濕、乾衣及空氣淨化功能，趁潮濕天氣未到，買定迎春都係時候。
現代人住屋一般都係幾百呎，一匹冷氣裝喺房真係綽綽有餘，呢部超靜窗口式冷氣機，重有一級能源標籤慳電保證，用得過。
意大利製的洗衣機，採前置式設計，有快洗程序及衣物防皺系統等功能。𠵱家購買嘅首十名買家，重有吸塵機送㖭，不過講明先到先得，送完即止㗎！
家陣買個舖頭品牌嘅雙門雪櫃都係咁嘅價錢，話晒都係來路貨，有四星級特強冷凍功能，加上VCM銀影防銹外層，型得嚟夠晒實用。
老闆周小姐
我哋覺得最緊要係服務好，靠客人口碑先可以做得住，所以通常都係由客人會介紹朋友嚟幫襯。
美的家電器直銷中心（23050008）
地址：九龍灣宏開道17號順發工業大廈12樓7-8號
營業時間：星期一至六上午10時至晚上6時；星期日及公眾假期休息。初十正式啟市。
自問有品味又有銀両嘅話，有冇考慮為家居添置歐洲Feel家具？有嘅話不妨嚟行一轉，老闆話佢哋專賣高級歐洲古典家具，保證百分百意大利或西班牙製造，絕對唔係國產貨。
差不多兩萬蚊買張書枱，有冇搞錯？貴就係貴啲，但話明係歐洲家具，淨係買氣派都要咁嘅價錢啦！貴？唔好意思，真係要咁貴喎！
老闆話呢張天使椅長期熱賣，櫻桃木做嘅坐椅，織錦皮織出天使圖案，高貴得嚟又有氣質，價錢都唔算太貴，買得過㗎。
宏基傢俬梳化公司 （27966633）
地址：九龍灣宏開道15號九龍灣工業中心10字樓14-16號室
營業時間：星期一至六上午9時至晚上7時；星期日及公眾假期上午11時至晚上6時。初十啟市。
開業只有半年，就已經成為新蒲點，只因佢有飯食之外，更有免費電腦上網，現場所見，每個客人都佔據電腦枱前，尤其男仔忘晒形咁打機，加上具CyberFeel的裝潢，有別一般茶餐廳，中西式食品都有，咁多元化自然大受歡迎。
大大盒飯只係賣十二蚊，去邊度搵？雞肉軟腍，加大片北菇，都幾香㗎，就算好大食，叫多個都係二十四蚊，抵！
飯飯店 （31063616）
地址：九龍灣宏冠道6號鴻力工業中心B座地下B3室
工廠區向來較多茶餐廳，自問唔鍾意人多嘈雜，可以嚟呢間靜靜哋嘅Cafe歎杯咖啡，食份鴛鴦三文治飛碟（$16），飲IcedCappuccino都係加$7，輕輕鬆鬆又可以消磨一個下午。
T.P.Cafe （26249987）
地址：九龍灣宏冠道6號鴻力工業中心A座2號舖地下
咪以為工廠區就冇好嘢食，好似呢間開業唔夠一年嘅西餐廳，環境唔錯，大廚來頭亦唔細，做過酒店同會所，食物水準有保證，主打自助晚餐，冷盤熱葷甜品多達幾十款，當然唔少得三文魚同生蠔呢啲貴價菜，唔使100蚊就食到，唔怪得之幫襯嘅人愈來愈多啦！
匯星西餐 （27549222）
九龍灣常悅道9號企業廣場一樓B舖
收費：星期五至日成人$98，小童$68；星期一至四成人$88，小童$58。
供應時間：每晚6時半至9時半