阿虎前日晚重以為大東炒起，是因為外資缺乏投資智慧，點知原來電盈（008）真係曾經去信大東話有意提出收購，同前日早上的通告內容不符，令到阿虎覺得好瘀，因為香港竟出現一間會以捉字蝨手段來愚弄股民的藍籌企業。咁重唔止，電盈對香港股民發放的訊息隱瞞有意收購大東的事實，對英國股民卻毫無保留，對兩地股民公布的資料持雙重標準，電盈管理層重喺度死撐唔肯認錯，呢啲係咩態度呀？唔通香港股民真係好蝦啲？定係本地監管機構特別寬容呀？簡直不知所謂。
電盈早前5合1，其中一個目的是提高股票價值吸引外資基金投資，如今爆出呢宗國際醜聞，重點叫外資基金入市支持電盈呀？真令人失望！
噚日粵海系又出現異動，特別係隻粵海啤酒（124）勁升12.3%，收報0.73元。有傳聞話粵海投資（270）快將進行資產重組，其中可能會出售粵啤，及收購母公司的東江水資產。
星虹控股（397）噚日果然在老詹效應下，一度急升33.33%，成交略為增加至148萬元，收報0.022元，升22.22%。大家小心呀，在證監盯得好緊之下，要跟炒只宜玩即日鮮。
i100（616）復牌，即急挫50%，低見0.027元，收報0.034元，跌38%。公司宣布永義國際（1218）只出每股1仙收購55%股權，代價只係600餘萬元。雖然會提出全面收購，但收購價就較停牌前報價折讓逾80%，都唔知接唔接受收購好，真係雞肋。賣畀佢，折讓又真係太大，唔賣，日後可能大供股，權益可能會被大幅攤薄，結果可能都係無好下場。
阿虎