所以話波友賭波水準愈嚟愈高，前日佩魯賈同AC米蘭喺意大利盃互交白卷，我諗好多波友係睇完AC賽前個衰陣至出手，搞到凌晨兩、三點佩魯賈急速落飛，平手超低水幾乎要讓波。AC派副選無輸到，禮拜日聯賽再鬥佩魯賈換番正規軍，肯定有着數。
鬼咩，睇見AC賽前公布嘅陣容：恩沙基、馬甸尼、尼斯達、迪達、雷哥斯達──全部無份（舒夫真高同埋施多夫都要到下半場中後段至落場），而佩魯賈幾乎夫添出擊，重邊有人敢捧AC場？果然場波AC控球時間係多，但致命埋門幾乎全部來自佩魯賈，唔怪得AC教練安察洛堤賽後話好滿意。
梗係啦，先用後備軍損耗人哋正選兵力，到禮拜日至換番正規軍蝦人，形勢唔贏至奇。呢啲就係大球會兵精糧足嘅好處。
我哋《蘋果波經》今日稍變陣，全日攻略唔再由某個聯賽擂台榜首做主打，而改由喺名家全日精選擂台領先一個馬鼻嘅波王，身先士卒代表本報提供全日心水。淨係睇幾乎所有名家都喺全日精選擂台有正分，就知參考指數極高。由呢個榜嘅榜首做主打一定更加幫到我哋捧場客。
曼徹斯特打吡戰係禮拜日英超重頭戲之一，單單睇前曼聯門神舒米高倒戈已經夠矚目。有間博彩公司好抵死，為呢個門神今場唔失波開咗盤，賠率係六倍。不過我求大俠覺得曼聯前鋒咁弗，再加埋呢場波擺明為復仇，我就唔敢博舒米高可保清白嘞，你點睇？
有十年或以上波齡嘅球迷，一定記得簡察斯基當年喺曼聯風光過，原來呢位三十四歲嘅過氣俄羅斯快翼，喺季前以自由轉會身份加盟英超修咸頓，但去到打躉時間居多，只係踢過兩場後備。最新消息係佢將會加盟沙地阿拉伯嘅艾哈利，真係來時匆匆，去又匆匆。
足總主席康寶駒噚日朝去新城電台接受訪問，我求大俠咁當然要聽吓佢講乜嘢，講嘅嘢新意唔多，但講到賭波規範後，重提想連本地波都賭埋。其實政府主動想搞好本地足運，足總應食住上同政府攞資源做好青訓，如果唔係，起多多球場都冇用！
有睇噚日NBA直播嘅湖人捧場客肯定睇到眼火爆，事關到第四節開始湖人重領先三十分，心諗呢個讓五點五分嘅上盤實食冇黐牙；點知湖人班冷板王莫域丹高、魯殊等射極唔入，防守又懶懶閒，俾紐約人狂追，要勞煩奧尼爾出番場先保住勝果，險勝五分，不過班擁躉就眼白白睇住場波由上盤變下盤，認真慘情。