一向口碑不俗嘅《C&C》系列，唔知係咪想食正美國打伊拉克個噱頭，新作竟以恐怖主義引發嘅第三次世界大戰為故事背景，不過當中無厘頭又關中國事，變成美國、中國同恐怖組織GLA三大勢力互片。新作額外加入六十幾個新作戰單位，兼且可擔任將軍角色，以獨特能力率領手下開戰。睇嚟就算布殊仔未開拖，機迷都可安坐家中打餐飽。
記者：徐影龍、李淮
逢星期一至五刊出
《C&C：Generals》個故事背景頗為誇張，主要係講2018年，有一個擁有生化武器嘅恐怖組織GLA（環球解放陣線），勢力不斷膨脹，最後重向歐美等地發射生化導彈，卒之導致美國同中國等超級大國嘅關係破裂，引發咗第三次世界大戰。一套出色嘅RTS（實時戰略），陣營之間互相制衡可謂非常重要。三大勢力擁有唔同嘅軍事設施，可謂各有長短，要百戰百勝必先了解三者不同之處：
隨住立體圖像技術提升，新一集《C&C：Generals》都一改過往2D表現方法，以全3D立體繪製地圖及各式軍備。亦由於採用最新開發嘅SAGE繪圖Engine關係，令到新一集可更為真實細緻咁表達戰地實況，如都市街景、高低不平嘅沙漠、一望無際嘅荒原等，而且各國軍事設備都可以更有氣勢咁表達，多人大混戰場面肯定更為壯觀，玩家投入度必定大大提高。
遊戲依舊支援網絡連線對戰，除咗合作及混戰模式外，戰鬥場地亦不再局限地對地或地對空打法，重首次加入空對空嘅戰事，而老兵模式亦有所強化，可分為四種等級。
除咗一堆常規武器外，遊戲內重設計咗好多天馬行空嘅戰鬥單位，例如美軍嘅衞星導向激光炮、GLA用作干擾飛毛腿導彈嘅「SCUDStorm」防衞導彈、極光戰鬥機、善打電子戰同竊取敵國資金嘅中國駭客，甚至會有一班烏合之眾（Mobs）等等，總數多達60種，善加運用足以將戰局扭轉。
另外《C&C：Generals》新加入嘅系統，就係設有將軍一職。玩家可從九位具備唔同特殊能力同交通工具嘅人物中挑選，各項特殊能力都有獨特用途，如增強坦克性能、對付駭客等，提升士兵能力抵抗外敵，大大加強戰略成份嘅考慮，唔會一味向前衝殺敵咁簡單。
香港EA大概喺下星期二度派貨，而行貨同《SimCity4》一樣分中英版本，遊戲內容一樣，分別除咗介面及說明書語言外，英文版重跟Game附送MousePad一個，而中文版就抵玩啲，送限量電話繩及BonusCD，兩個版本賣價都係$290。最後一提係隻Game會同時推出三款唔同設計嘅封面，三盒砌埋極有氣勢，點揀就隨你喜歡喇。
雖然隻Game未到，不過一眾玩開嘅機迷均表示好有興趣，今集一樣會捧場。
遊戲類型：實時戰略
對應機種：PC
遊玩人數：1人及Online
開發商：WestwoodStudios
發行：ElectronicArts
發售日期：2月11日
售賣點：Mas
查詢電話：25911770