股市疲莫能興，美國國務卿鮑威爾前晚在聯合國發言後，美股一度竄升，可惜後勁不繼，倒跌收場。港股一樣唔靚，恒指繼續陰乾，幾乎全日處於負區，國企升勢亦見收斂。
鮑威爾就伊拉克隱藏大殺傷力武器所提交的新「證據」，是否可信見仁見智，但中、法、俄3國已表明希望武檢工作繼續，則顯然未有被老鮑說服。不過，美英大軍已集結波斯灣，正是如箭在弦，不得不發，所差者時間而已。
喺戰爭陰影下，股市自然易跌難升。恒指昨日已微破頭肩頂頸線，去年10月嘅上升裂口（8990-9131）亦已補咗部份，技術走勢當然好差，但趙飛雲始終相信，短期內大市隨時反彈，然後再次尋底。
恒指9RSI昨日跌至22，再睇番幾隻重磅藍籌嘅9RSI：滙豐（005）19.3；中移動（941）19.9；和黃（013）24.7，均處於大超賣水平，照計足以支持一次反彈。新地（016）9RSI處於27.9，唔算太低，但明顯背馳，短線不宜睇得過淡。不過，滙豐、和黃同中移動嘅技術形態甚差，估計恒指即使反彈，亦難越10日及20日線，到時趙飛雲會伺機做淡。
呢次過早沽出Put輪，贏少好多，好彩有隻意科（943）補番多少。意科昨日高收0.244元，升近9%，短線目標已近，故趙飛雲先沽一半，剩低嘅揸耐啲，計數位推上0.22元，聽老友講，隻股中線有機會見3毫。
趙飛雲