新年期間，收到幾位海外朋友嘅拜年電郵，順道家庭近況；睇完深覺現代科技之進步，打吓字㩒吓掣，就可與多倫多、曼谷、三藩市溝通，方便到極。記得電郵在香港開始流行，係九四年左右，當年之軟件，與今日相比，相差遠矣。
左丁山算係少用電腦，少用電郵嗰類人，係乜嘢原因？除咗自己懶之外，十幾年來俾秘書縱壞，相信係主要原因。既然旁邊有個人可以包搞掂，自己口噏噏就得啦，平時使乜自己親自上網？
人力專家R就話左丁山唔親自上網，損失唔少嘅資訊與上網樂趣。佢知道某大傳媒高層N最鍾意自己上網發電郵，閒閒哋每日可以向下屬發出一百幾十封，連叫秘書入房都唔會用intercom或者大聲嗌，而會用電郵呼喚：「瑪莉/安妮/祖兒，請入嚟」諸如之類，佢打電郵速度之快，相信全港行政人員無出其右，秘書小姐亦唔係嗰皮。
高層N亦有一絕招，就係主持工作會議之後，唔使半個鐘頭，佢已經親自寫好會議記錄，用電郵送到各部門頭頭嘅電腦，要啲頭頭照單跟進。人力專家R聽到就羨慕，因為佢係某大機構乜乜委員會召集人（義務職位），兩個月前召開會議，與四個主管開會，每個主管帶一位秘書嚟。一共九個人。專家R話：「開完會之後，機構主席話嚟同各位握手，順便請食午飯，睇怕唔夠位坐噃。主管面色大變，急忙話辦公室有事，叫啲秘書返去先，然後繼續開會。結果呢？過咗兩個月，專家R仍未收到會議記錄，梗係冇人跟進做嘢啦。