港股持續弱勢，恒指噚日一度跌穿9100大關，收市雖能守穩其上，但形勢已岌岌可危，特別係期指持續低水，即月期指低水36點，3月期指更大低水126點，市場氣氛明顯向淡。頭肩頂形態一獲確認，上次8772的低位亦難守穩。
噚日上升股（不計認股證）逾200隻，個別國企仍有好表現，大部份則出現調整。化工股最強，上海石化（338）繼續領導群雄，最高1.46元，收1.43元，升3仙，成交6949萬股，總值接近1億元。上石化升到現水平一般投資者都會獲利回吐，即使不會全沽，亦會逐步減磅，但基金同大行仍繼續大手扯吸，以中線計，若預期利潤冇3至4成，佢哋唔會咁積極收集，因此，上石化依舊係投資國企股之佳選，目標價為1.8元至2.0元。
國企股急升後出現調整好正常，好似兗煤（1171）都只係回一個位，承接力好強，大行仍在密密收集。至於鋼鐵股，最強勢都係鞍鋼（347），雖曾一度跟市回落到1.42元，但尾段又見有大買盤掩至，掃上1.46元收，逆市而升1仙，整固完成後，可向量度上升目標1.6元推進。
國企每年都有一兩個大浪，今年亦不例外，現時雖然話已升咗好多，但套用賽馬術語，𠵱家都未入直路，有排砌。睇番最近兩個大升浪嘅紀錄：
（1）01年3月13日，國企指數由1589開始升，到同年6月5日，升到2638，升幅66%，時間兩個多月。
（2）01年9月17日，國企指數由1555起步，升到02年6月13日的2266，升幅45.7%，時間足足有9個月。
（3）今個升浪，由02年10月10日起步，當時指數1747，到噚日為止，升到2262，升幅29%，時間約4個月。
上兩個升浪，國企指數平均上升55%，時間平均接近6個月，以此推算，今個升浪應可持續到4月，指數有機會去到2700水平。短期國企股升勢仍會持續，調整或會有，但不會大跌，而每次調整都係低吸的好機會，目標仍係以原料、石化和公路電力股為主。
郭兆誠