新盤開售，好多由樓花賣到入伙，仍然重有得賣。有啲丟空多年，買番嚟有排執先住得。
恒基將軍澳新都城二期，入伙已經三年，最近有個一手單位成交。
蘭西聽到，賣出之後，恒基主動為買家更換全屋地板，重略為執過內櫳至交樓。唔使買家入到去，覺得好似買咗間舊樓咁。實在值得一讚。
今時今日，大家都講求增值，恒基肯落本，執好啲貨尾至交畀人，自然贏得口碑，對促銷有幫助。其他同業好加把勁嘞，若果唔係，手上嘅貨尾會愈嚟愈多。
據悉，新都城只剩十幾個貨尾，全部都喺第二期，面積六七百方呎，叫價每方呎二千八九。
地產代理近年都積極參與義工活動。美聯成立兩年幾嘅美善會，今年嘅義工活動，已經由年頭排到年尾。聽講佢哋今年會發動二百五十個義工，目標要為十五個機構，提供六千小時服務。其實，美善會舊年都有為十三個機構，做咗接近四千六百個鐘義工服務，約增加三成。
美聯主席黃建業委任新紮董事鄧天勇、伍創業、黃子華同李志成做「美善大使」，協助推廣美善會工作。
代理鬥生意之外，連做慈善活動都鬥一番，間接令好多人受惠。
房協將軍澳怡心園，最快喺今個月底推出。話晒都係將軍澳區羊年第一個大型新盤，地產代理相當緊張。美聯已經派同事到現樓，預早影低晒啲內櫳、平台同景觀嘅相，方便推銷。內櫳主要影第一座單位，方便準買家做參考。相片顯示，間隔都算四正。
至於第一座嘅景觀，望樓景同山景，代理專登喺二十樓同四十樓各影一張相，等準買家未有得睇現樓，都可以有現場實景相睇。
位於寶康路嘅怡心園，共有五座住宅大廈，提供一千五百幾個單位。
戴德梁行商舖部助理董事胡莘對蘭西講，北京舊年開始興起主題商場。已開業嘅，有九倉設喺時代廣場嘅開放式概念百貨店LCX，同埋品牌直銷OUTLETS嘅燕莎OUTLETS購物中心等。
籌備中就有選址宣武區嘅歐洲OBI，同落戶海淀區嘅歐洲B&O兩家售賣家居產品嘅主題商場。
呢啲商場個個都係巨無霸，好似中關西村就有一個二百二萬呎嘅商場籌備緊，可出租商舖樓面都有一百一十萬呎，所以未來北京商場供應都唔少。但胡莘認為供應主要喺兩三年後出現，明兩年就供應唔多，所以租售價都唔會有太大變化。
胡莘話，當地都有本土主題商場，好似專門賣花、兒童用品、玩具、電器等，不過規模較細，一般都係十萬呎左右。
蘭西
電郵地址：