陳冠希（Edison）新碟《HitsorMisses》將會喺下星期推出，今次新碟嘅封面同改名，都係Edison親自度橋。
新碟嘅封面係Edison企喺半光半暗嘅攝影棚，地下滿布長箭，佢重俾一支箭射中屁股，Edison話：「呢輯相有兩個寓意，相裏面啲箭射我，有啲中有啲唔中，即係話我今次隻碟裏面嘅歌，有啲係我好鍾意，有啲我未必好鍾意；另一個意思係上年傳媒報道好多關於我嘅是非新聞，我好似做咗箭靶咁，有啲中有啲唔中，唔係單單都係真囉！」
問Edison邊啲新聞係真、邊啲係假？佢笑住咁話：「有雪亮眼睛嘅人咪知囉。」
另外，Edison亦影咗輯靚仔相，不過佢竟然手痕痕畫花張相，將自己畫成好似海盜咁，相當搞笑。Edison嘅唱片公司已經訂咗紅隧外嘅廣告位，十號開始掛佢新碟嘅相上去，包括張海盜相，Edison話：「我貪過癮，唔使成日做靚仔嘅！」
蕭正楠今個羊年可謂豬籠入水，繼早前接拍手表廣告後，近日又獲韓國車Hyundai（現代）垂青，邀請佢擔任代言人，為期一年，又拍攝一系列硬照廣告。據知酬勞重高達六位數字，以一個新人而言，酬金都算唔錯。
昨日蕭正楠為Hyundai嘅Getz新系列拍攝硬照廣告，Getz乃走年輕人路線，所以廣告商搵蕭正楠做代言人，都幾適合。
葉璇、關禮傑及成奎安噚日去無綫電視城出席「二月星辰」生日會。情人節二十三歲生日嘅葉璇，話當日會同Shine成員又南拍攝愛情短劇。問葉璇有冇發新年財？佢話：「都有賭錢，不過就冇發財，最開心係今年𢭃咗好多利是，爹哋嗰封最大，有成五位數字。」
蔡少芬噚日返將軍澳電視城開工，佢話新年同舅父仔去泰國玩咗幾日，重買咗好多嘢返嚟，佢話覺得自己好似女王咁買嘢絕不手軟。
今次蔡少芬特登着三點式曬太陽，佢話：「今次係我選完港姐之後第一次着三點式，都唔知幾性感，啲外國人重眼甘甘望實我，好似未見過咁靚嘅中國女仔咁！」
羊年認真喜事多籮籮，今次輪到賭王二姨太藍瓊纓嘅姪女藍潔嫻傳婚訊，佢噚日喺電話度透露婚期，佢話呢個月喺紅棉路婚姻註冊處先註冊，而婚宴安排就未定，藍潔嫻話自己喺馬年病足成年，唔知係咪要喺羊年結婚沖喜吓呢？
