事業每下愈況嘅米高積遜（MichaelJackson），近排似乎有機會反彈，自從米高個訪問節目《米高積遜大追蹤》星期一喺英國出街之後，佢喺當地嘅唱片銷量忽然狂升，米高嘅精選碟《GreatestHits：HIStory,Vol.1》銷量比平時多出十倍，而舊作《Thriller》銷量亦上升五倍，搞到唱片舖冇晒貨，你都咪話唔巴閉。
另外，米高喺節目入面承認佢同過好多小朋友一齊瞓覺，而曾經係曼聯翼鋒嘅摩根，佢個女姬娜睇完個訪問後，大讚米高係一個好好嘅人，重諗住遲啲帶埋佢十歲嘅仔去米高度住喎。姬娜話十年前米高之所以牽涉一宗兒童性騷擾案件，完全係因為控方想搵着數。不過洛杉磯一律師已經寫信去兒童福利機構，要求佢哋就節目內容展開調查，睇吓米高同小朋友搞乜，而米高就話主持人同製作人將部份內容歪曲咗喎。