當年DreamCast隻《SEAMAN》人面魚率先引入用Mic對講式嘅新鮮互動玩法，曾創下賣40萬套高銷量佳績，而剛推出嘅《OPERATIONSIDE》同《DOGSTATION》同樣打正旗號以Mic掛帥，不過一隻玩解謎另一隻就玩養狗，名副其實動口不動手，真係少啲口水都唔得。兩款Game現貨連咪賣價約$680。
之前以附送《MetalGear2》體驗版而成功吸引機迷購買嘅《Z.O.E.》，新一集將會喺2月14日情人節見街，據聞今次限定版幾缺貨吓，而另一隻《龍珠Z》嘅日本版附送四星珠，行版則送悟空Figure，有興趣就要留意相熟Game舖。
《真．三國無雙3》會喺2月27日正式發售，據行內消息稱，行貨版本將會跟日本同步推出，機迷唔怕水貨猛炒喇。而今次行貨除咗包裝之外，入面內容會同日本版一樣，不過暫時未有定價。
繼《TOD2》、《DMC2》推出特別版記憶卡後，日本各大廠商再斬幾両，喺3月份推出《真女神轉生if》、《機戰2》、《VF4Evo》及《櫻大戰～熾熱血潮》嘅特別版記憶卡，Fans睇怕都走唔甩。
等到頸都長嘅Xbox大作《最後一戰HALO》將於下星期尾抵港，今次行貨內容會有齊中英文選擇，玩起上嚟零舍易明，打爆機都唔使睇攻略。另外代理重會搞大型比賽，有興趣好早啲買隻Game返嚟練吓。