花邊新聞說，局長求完「凡事不吉」下籤後，記者八卦訪問同行的局長夫人。局長夫人對老公當上局長一職直率表態說，局長個位唔做好過做，因為又唔係搵得錢多。
這段新聞幾句而已，嗒落倒很有味。香港地，講心搵你笨，講金才實際。邊個搵得金多，就有面子、有牙力。精打細算的女人搵歸宿，實牙實齒，未埋單前已經計好成盤數。養妻活兒搵米路，是女人眼中男人的生存強項，既然搵得少過以前，做來幹麼？
局長夫人不是特首夫人，搭頭等未必搶到個1A位坐。論風光，遠不及商家包起的明星與世家闊太。是以只能斷斤秤，睇下局長老公能賺幾多銀。愈多銀愈有用。錢賺少過以前，冇咁多銀用，在女人心坎裏明顯減磅喪權。
局長只得十一位，小女人爭崩頭都未必嫁到局長，撫心自問，老公搵得唔多時，你怎麼表白？
搵得唔多、搵少過以前、愈搵愈跌價，只要事先有心理準備就得。三餐兩個菠蘿油我就夠飽肚了，其他使費盡省得省；省下來買酒，包頂癮的北京紅星二鍋頭才廿五塊錢一瓶，月費無幾，一定不會使凸。搵得少，唔係打得少，冇有怕。