英格蘭名宿連尼加曾經講過，二十二個球員喺球場上踢波，最後贏波嘅通常會係德國人；但計我求大俠話，兩隊輪流射十二碼，射贏嘅肯定係德國人。
喺前晚進行嘅德國盃同英足總盃，有三場波都要用十二碼分勝負，不過我求大俠估唔到布力般成班球員原來冇個識射十二碼。射十二碼之前或者你會睇好布力般，事關佢哋龍門費度救十二碼有一手；點知大衞湯臣、高爾及加比都係「十二碼白癡」，全部射失，結果搞到布力般喺十二碼以○比三輸畀新特蘭。
但係德國佬就唔同，佢哋射十二碼真係醒到你唔信。利華古遜喺十二碼就贏安達赫治五比四；而凱沙羅頓就贏波琴四比三。點解德國球隊要到第四第五輪先分到勝負，但係英格蘭球隊只係踢兩、三輪？無他嘅，之唔係後者唔識十二碼囉！
記得英格蘭國家隊喺世界盃兩次輸十二碼出局，而阿仙奴喺○○年歐洲足協盃決賽亦因為射輸畀加拉塔沙雷攞唔到冠軍；但係德國國家隊喺國際賽射親十二碼都贏，而拜仁喺○一年歐冠盃亦憑互射十二碼而攞到冠軍。咁樣睇嚟，英格蘭球隊同國家隊真係要向德國人好好學習。
開講有話「萬惡淫為首」，我求大俠就話錢都係，點解？你睇拉素就一清二楚。上半季拉素真係捧場客恩物，雖然主場偶有失手，但係作客就真係贏到開巷。點知自從有銀行喺年初幫佢哋搞掂筆數後，就好似洩咗氣嘅皮球，連同周三意大利盃準決賽首回合一比二輸畀羅馬，歇冬後四場意甲聯同三場意大利盃，只贏過一次亞洲盤，拉素拼搏精神唔通真係已經俾金錢摧毀？
曼聯同曼城喺今個禮拜日會進行同市嘅打吡大戰，而曼聯球迷就率先行動，喺佢哋個官方網頁，用啲米奇老鼠卡通嚟笑曼城領隊基瑾當年球員時代嘅爆炸頭髮型。我求大俠雖然好理解曼聯球迷嘅行為，不過曼聯假假哋係世界知名球會，而喺呢場波論牌面亦都贏晒，所以佢哋球迷重做埋啲咁嘅嘢，似乎有失風度喎！
上個月轉會市場重開，成日聽到馬賽嘅比利時後衞尹貝頓，受到唔少大球會好似曼聯、紐卡素等垂青。前晚法甲直播，佢就響我求大俠面前射入近五場聯賽嘅第四球，以後衞嚟講呢個數字真係好驚人。不過最開心嘅，都應該係馬賽會方，起碼第時要賣走佢，叫價都可以再嗌高啲啦！
76人噚日對作客唔多掂嘅網隊，對手前鋒馬田第一節就傷出、傷病初愈的傑特同謝菲遜只上陣二十七分鐘，簡直讓齊車馬炮咁款，但76人咁都可以被大炒二十六分，擁躉都咪話唔心傷；呢場失足一百一十一分的76人如果再唔執好啲防守，莫講話重奪東岸冠軍，連季後賽一席都隨時不保。