港股繼續下跌，恒指收9126，跌54點，跌幅雖不大，但日日陰吓陰吓咁跌，情況更凶險，因為都唔知幾時至係低位，現水平應否入市吸納實令股民疑惑。
星虹控股（397）嚟咗一個新大股東，就係有綽號金手指之稱的詹培忠。據黑客話，老詹應該係從認購供股股份而買入星虹近兩成股權。噚日朝早星虹股價仍下挫12%，低見0.015元，但其後詹培忠入股消息傳出後，股價隨即反彈，收報0.018元，倒升5.88%，不過成交只有41萬元。
黑客話，單憑老詹個名都已夠照，唔使真金白銀都可撐起個股價啦，況且供股後大部份貨源盡入自己友手中，重邊度有貨沽呀。如今老詹做大股東，以後星虹將會有排玩咯。不過證監會會唔會郁吓就叫停隻股就好難講，大家執生啦。
噚日無情情傳出電盈（008）會向大東提出現金收購，其實個傳聞都幾無聊，以現時電盈的財政實力，邊可能會用現金收購市值比自己大的大東呢？不過，阿虎聽到的另一版本，是電盈可能向大東提出回購電盈股權至真。當然亦有版本話電盈可能收購大東部份電訊資產。不過，阿虎與一眾豬朋狗友都認為，電盈着眼於穩定本身的股價多於想投資新項目，所以收購大東資產之說同樣是無聊。電盈噚日收6.05元，無起跌，成交6581萬元。不過，英國嗰邊一聽到呢個消息即把大東炒高7%，阿虎真係懷疑外資的投資智慧有幾高。
中外運（598）傳聞話配售獲6倍超購，不過包銷商都唔敢大貪，只想以中位數2元定價，希望在上市後有上升空間，以免基金客戶全部坐艇，鎖死晒啲資金，其實現在市場游資已經買少見少。
阿虎