美伊局勢繼續緊張，紐約油價又創新高，將來美國如果出兵打伊拉克，下文如何暫時唔去估住，不過短期油價唔易回落，對啲油股有刺激作用。
中石油（857）再升3仙，收1.70元。有隻中石油Call輪諗得過，就係9232，隻輪今年11月至夠鐘，現價19仙，溢價只係1.5%，槓桿率8.9倍，入於抵買嗰隻。
油價上升對中石油最有利，其次對中海油（883）亦有利，不過中海油嘅PE高好多，所以中海油股價郁得慢啲，但中海油有隻Call輪9299亦啱短炒，隻輪買賣易，下月杪到期，現價5.1仙，溢價2.4%，槓桿率20.7倍。
中電信（728）近排時有大手成交，昨日收市前3分鐘，有手兩邊客82球上板，每股1.50元，收1.51元，可能係3個月前上市時啲貨轉手。中電信既然有人肯大手要貨，股價應該睇好些少，搵啲中電信Call輪玩吓，對象係9686，明年1月到期，現價26仙，溢價11.8%，槓桿率5.8倍，溢價係高啲，不過其他同系輪溢價亦隻隻都係好高。
地產股有跌定迹象，恒地（012）收22.50元，跌10仙，博反彈，揀Call輪9576埋手，4月中夠鐘，現價23.4仙，溢價3.7%，槓桿率9.6倍。
章盛