農曆新年，可以跟親戚朋友拜年𢭃利是，樂聚天倫，確是賞心樂事！而喜慶場合，少不免大家都會飲兩杯酒助興一番！有時一大班朋友唱K或者去酒吧，我都會一齊飲，只是一杯起兩杯止，因為朋友都唔會威迫我醉酒駕駛的！
但在英國讀書時，食得薯條同Pizza多，個人就好熱氣，臉上還經常長出痘痘，而我又要靚仔，但阿娘親又不在身邊煲涼茶給我飲，就真係侷住要飲鬼佬涼茶，即係啤酒啦！班英國同學還飲得好瘋狂，尤其係睇直播英格蘭打世界盃外圍賽的時候，平均我飲一支啤酒，佢哋就完成兩支半，還連隨問我下支飲咩，爭住請我飲！真係飲得太多喇！
其實，適量飲酒能增加好的膽固醇HDL形成，而膽固醇可以分為壞的膽固醇LDL和好的膽固醇HDL兩種，適量飲酒能促進血液循環，將壞的膽固醇帶返肝臟，避免在血管內積聚，減低心臟病機會！此外，適量飲酒亦有助解除壓力的效果，當大家工作或生活壓力過大時，身體便會分泌出一種茶酚胺（catecolamin）的物質，它會間接導致癌症，老化以及疾病的形成。
雖然飲酒在某程度上是好的，但我一定要再三強調，只有適度的飲酒才有健康的功效，千萬不要誤解；假若大家每次飲酒，都「劈」到頭暈眼花，那就肯定會弄巧反拙了！請謹記酒乃穿腸之物，飲酒定必要適可而止，才可擁有健康的身體。
馮嘉奇
港大體育系學生/澎馬流浪球員