和黃大班霍建寧曾經講過，希望新城電台有朝一日能夠由雞肋變成油雞髀，𠵱家暫時仍係雞翼尖；咁究竟幾時可以變髀呢？新城話事人甘國亮噚日出席港台新春團拜時，就畀咗個貼士大家──舊年第四季嘅業績較其他行家好，全年營業額亦較前年增加咗四成九。
咁前景係點呢？甘仔話唔敢講係咪已經由雞翼尖變成雞中翼，但噚日團拜前佢專誠去黃大仙為新城求咗支籤，係第三十五籤「唐僧取經」。
甘仔馬上搵人解籤，根據鳳凰衛視老闆劉長樂講，唐僧取西經路上雖歷盡險阻，但最終成功。八方聽到都覺得黃大仙靈，新城現況又真係幾似唐僧四師徒捱世界；但唐僧雖苦，點都好過何志平局長為我哋求個支八十三籤「浪打頭、難寸進」呢！
傳真︰2623-9278
電郵︰