噚日港台新春團拜，各大電子傳媒巨頭同主管傳媒之工商及科技局局長唐英年當然全部到齊，局長除咗大派紅衫魚，又大講自己點過新年。
佢話新年期間留港消費，睇咗兩套西片《新鐵金剛之不日殺機》同《捉智雙雄》（隨即噓聲四起），但一直好支持香港創意工業嘅唐局長表明，新年前經已睇咗《無間道》同埋《英雄》。咁邊套最好睇呢？局長話梗係《無間道》啦，因為故事、拍攝、演員都好，最重要係香港製作。
局長又話當局好鍾意外國片來港取景，因為外國電影公司每用一蚊，香港就得到二個半嘅經濟效益。
講到好多官員都被委任為政協，惟獨佢冇份，唐英年話一直全心為特區政府服務，希望做好本份先。冇份都唔緊要，噚日就有Fans用佢個名作咗對聯畀佢：「英氣深藏呈銳氣，年華正盛顯才華」，算係補數啦。
（圖）唐英年平日官仔骨骨，點假炮仗都咁驚青，真嘅咪唔敢點？
傳真︰2623-9278
電郵︰