過年前（一月二十八日）睇到李登寫《邵爵士的燈籠》，左丁山笑到碌地，估唔到呢位有型有款嘅中年男士，平時寫文鬧人，拳拳到肉，今勻突然出軟功，夠晒幽默。李登嘅「老年金牌獎」，竟然打個乞嗤就吹出窗外，其薄可知，大概半錢都冇。
李登唔係唯一一個嘆息爵士燈籠嘅人。呢日碰到一個記者，話係中大畢業，於是問佢：「你哋新亞新聞系好多人才噃……」記者連忙搶住更正：「我係逸夫嘅。」原來以前新聞系學生統統係新亞人，𠵱家已經散佈四間書院。左丁山話：「逸夫好嘢吖，有邵爵士照住，邵爵士一年捐一億畀內地大學，多年來好似合共捐咗二十六億元，中大逸夫書院都怕揩到零頭啩！」記者睩大雙眼：「唔知噃，我淨係知中大四間書院之中，逸夫書院最少獎學金，重差過手空空無一物嘅新亞，如果邵爵士嘅燈籠肯照住，我哋點會窮過呻窮幾十年嘅新亞呀！」
後生仔大概唔知咁多內情，根據一位識得李登呢位唔知恩圖報嘅文人（攞咗金牌都吹走佢，重唔係冇心肝？）嘅權威人士講：「逸夫書院有籌款活動嘅，不過一啲大商家好尊重爵士，唔敢威過爵士，喂，人哋間書院以逸夫為名，你重走去捐三幾千萬，唔驚俾爵士笑你冇銀咩！又如果爵士燈籠唔去照住逸夫書院嘅話，又點輪到你去照呀？講吓資格先！」權威人士果然懂得富豪心理，後生記者要學嘢嘞。