新年傳來壞消息，糖王郭鶴年姪女婿柳代風（圖）年初一於吉隆坡辭世，享年六十有二，遺體將運返本港，本周五在香港殯儀館出殯。
郭氏家族一向低調，柳代風嘅新聞就更加罕見，香港一般人話佢係糖王女婿，不過，《福布斯》有次以郭鶴年為封面故事，提及柳代風係郭鶴年嘅姪女婿（nephew-in-law），並以「Robert'schieftroubleshooter」（郭鶴年嘅首席和事老）嚟形容柳氏。
其實，柳代風喺六四年已經效力郭氏集團，曾任嘉里集團副主席、香格里拉主席同郭氏集團屬下多間主要公司嘅董事。據八方所知，柳代風係買賣糖嘅專家，現貨期貨皆精；此外，佢同紅色資本家榮智健都有淵源，曾為榮太子嘅私人顧問。
八方記得，九一年中信泰富聯同城中多位超級富豪包括李嘉誠、鄭裕彤同郭鶴年等收購由何善衡同梁銶琚創辦嘅恒昌企業（大昌貿易行即為恒昌旗下公司），禮聘剛辭任香港聯合交易所行政總裁嘅袁天凡擔任行政總裁，但袁天凡只做咗三個月就辭職，而臨危受命接替阿凡的，就係柳代風。
傳真︰2623-9278
電郵︰