港股噚日跌破9200，收報9180，跌72點。睇個勢就真係差得緊要，短期要下試8800，甚至跌破此關絕不出奇。炒開美股嘅ICQ英哥話，今次金價勁升是因為有基金開始信唔過美元，亦信唔過企業盈利預測，所以搵黃金保值保本，絕對唔係短線炒打仗咁簡單，亦即意味股票及債券市場可能會大跌價。當然，呢啲基金經理亦有睇錯市的可能，但到目前為止，全球經濟好似都仍未見曙光喎。
和黃（013）喺正全球不景氣的情況下推出3G，推出初期的反應一定唔慌好，和黃隨時會被拋售，噚日此股沽壓再現，跌2.67％，收報47.30元，成交達到6.91億元，傳聞是因為有基金唔睇好3G業務，對和黃行減磅之刑。
貴金屬就話升值啫，點知重帶絜埋礦業股，中鋁（2600）勁升11.28%至1.48元；江西銅（358）升12%至1.39元；兗煤（1171）升4.3%至3.60元。不過，黑客話，其實邊關金價事，只係班中資趁春節期間流入香港，暫時重未捨得返鄉下，留在香港繼續炒，當下周國內股市開鑼後就可能出現獲利回吐，資金亦會分階段回流國內。
永義國際（1218）收購ｉ100（616）55%股權，但兩股噚日重未捨得復牌。以永義目前情況，相信出價唔會令人有太大驚喜，反而令人擔心永義會否又再藉詞供股，而ｉ100成為其附屬公司，又會否不斷供股集資。畀着阿虎是ｉ100股東，唔理三七二十一畀晒啲股份永義算數，不敢抱太大期望。
華晨（1114）靜雞雞炒上，有春江鴨話，公司與前主席嘅訴訟呢個禮拜五會有結果，傳公司有信心贏梗，一定可以撤銷仰融的禁制令，股價反彈可期，所以炒定先。
阿虎