羊年社交圈傳來喜訊，鄭裕彤契女、靚女牙醫明美連宣布與男友Jimmy於年尾結婚。明美連表示本欲當五月新娘，但因教堂與君悅酒店場地預訂需時，且不願因契爺鄭裕彤是君悅老闆而打尖，破壞規矩。
羊年剛至，社交圈便傳來喜訊，新世界集團主席鄭裕彤的契女、靚女牙醫明美連宣布與任職金融界的男友吳祥貽（Jimmy）結婚，兩人在洛杉磯讀書時認識，不過拍拖則是近兩三年的事。
喜訊是由明美連父親明嘉福漏口風公布的，前晚明嘉福出現灣仔君悅酒店時，被問到女兒明美連何時結婚派利是？明嘉福笑笑口說：「就嚟㗎啦，訂咗位就得㗎啦，君悅個期成日都full嘅，所以𠵱家都未定到日子。」據悉明嘉福一直對Jimmy的印象十分好。
記者昨日致電向明美連求證婚訊，她一口承認並說：「日期重未定，如無意外應該喺年尾，𠵱家十劃都未有半撇，因為要等教堂同君悅有期先得。」她續說：「其實屋企人冇催我結婚，反而係你哋傳媒畀壓力我，我見男友都求咗幾次婚囉，咪結囉。」
明美連又表示身邊很多已婚朋友都請纓任她的婚前顧問，所以她對婚禮不太緊張，她說：「只有兩樣嘢我係一定堅持嘅，我係天主教徒，所以一定要喺教堂行禮，同埋要喺君悅擺酒。我好想做五月新娘，但係要等教堂同君悅個期。」
眾所周知，明美連是君悅老闆鄭裕彤的契女，相信只要她開聲，在君悅「攝」一個期應不困難，明美連即說：「酒店嘅嘢要有規矩嘅，我唔想破壞人哋嘅規矩。」問她何不考慮君悅隔鄰的會議展覽中心，她說：「去會展好似開會咁，唔夠氣氛。」
談到新娘最重視的婚紗，問明美連會否像大部份名媛般，飛往美國紐約度身訂做名牌婚紗VeraWang？她一聽便說：「紐約𠵱家咁危險，我諗喺香港都會揀到啱心水嘅婚紗。」
採訪、攝影：林妙萍、梁錦雯
