中國人話齊家、治國、平天下，雖然唔期望老董可以平甚麼天下，但作為一個地方嘅領導人，至少唔好畀香港人覺得，佢連叫個老婆收口都冇辦法。
𠵱家董特首嘅民望咁低，邊個可以令佢唔再跌？其中一個答案係董太。八方相信只要佢保持緘默，已經幫老董一大忙。所謂講多錯多，董太過往咁多次發表高見，由「執垃圾」到「下籤論」，有邊次好評如潮，拍爛手掌嘅呢？如果冇，好心咪再評論時事啦。
董太或者愛夫心切，又或者以為自己係希拉莉，他日會步出前台參政，否則，唔該學下肥彭老婆林穎彤，或衞奕信惡妻黎丹霞，以至國家主席江澤民嘅夫人王冶坪，睇睇有邊個會成日好似開籠雀咁出嚟講三講四？有人話，成功男人背後一定有個叻女人，妙論也。
傳真︰2623-9278
電郵︰