啱啱喺MacWorldExpo中曝光嘅兩款新Notebook，噚日終於喺香港舉行發布會。呢兩款新機都以多項改良作賣點，其中17"型號雖屬全球最大屏幕嘅機種，不過機身及厚度都令人驚喜。今次重專誠請嚟一班Mac機發燒友，到蘋果電腦辦公室，親身一試呢兩部新機㖭！ 記者、攝影：徐影龍
喺兩部新機推出之前，蘋果電腦及《電腦科技》版合作搞咗個試機大會，之前已公開招募一班試機用家，報名人數頗為踴躍，最後經編輯部邀請其中七位一齊試機，成為全港最快親身體驗新機嘅一班用家，睇吓呢班Mac友對新機有咩評價。
新PowerBook系列一向畀用家一種纖薄輕巧嘅強烈印象，估唔到兩款新機更進一步，最強17"型號不但係配備全球最大屏幕嘅Notebook，而且All-In-One式包埋SuperDrive都只係一吋厚，比好多外置光碟機嘅PCNotebook重要薄，幾乎可以用一「塊」Notebook嚟形容，相當之厲害。另一項特色就係17"型號嘅鍵盤底下內藏270條光纖，機上感測器隨住環境轉暗，鍵盤懂得自行發光及調暗屏幕，好有CyberFeel。其他硬件規格亦屬系列最強，除1GHzG4處理器外，重有512MB記憶體、60GB硬碟、Geforce4440Go顯示晶片及SuperDrive，而且亦已內置AirportExtreme，支援802.11g高速無線傳輸制式（54Mbps），以及完全兼容舊有嘅802.11b。值得一提係FireWire兼容最新嘅800制式（800Mbps），比USB2.0差不多快一倍。
至於12.1"型號，同樣以輕巧為首要賣點，1.18"的機身厚度雖比17"型號厚，不過仍比iBook嘅體積為細。值得一提係12.1"型號已內置CD-ROM，屬全球最細之齊料機種，特別適合流動工作嘅用家。
蘋果電腦香港訂購網址：