巴西國家隊早兩日決選咗訪華大軍，大部份二○○二年世界盃奪標功臣難得聚首一堂，同埋嚟中國遊吓埠，樂也融融。不過有人歡喜有人愁，龍門馬高斯因為缺態冇份入選；再加埋佢之前想加盟阿仙奴一事觸礁，真慘。我求大俠重記得佢喺世界盃嗰陣何等風光，估唔到之後就一直冇運行。
本來跟唔到大隊都算，最樣衰係教練彭利拿寧願選個未代表過國家隊上陣嘅施薩，都唔用佢，擺明唔畀面。
查實馬高斯嘅噩運由去年底已經開始，佢效力嘅彭美拉斯要降班，而啱啱嘅禮拜日佢隊波輸畀名不見經傳嘅巴巴倫斯二比四，馬高斯重要俾人笠死㖭，真係衰開有條路。
列斯星散，再賣人嘅話，莫講話主席列斯杜爾有性命危險，隨時連球場都俾人拆埋。嗱，阿倫史密夫呢個後生仔就醒啦，知道高層唔敢再放走主力，於是利用呢個時機同球會傾續約條件，終於俾佢「老屈」到四萬鎊周薪續約三年半。咪睇呢個小朋友喺球場上成個波牛咁，原來咁鬼醒目，真人不露相。
愛華頓今季嘅表現有目共睹，由季中開始一直壓住同市球會利物浦，一吐多年烏氣。近日利物浦《回聲報》就頒咗個體育風雲人物獎畀愛華頓領隊莫耶斯，表揚佢舊年帶到隊波踢得咁好，以前類似獎項統統由利物浦領隊或者球員攞，今次都算打破壟斷。
「快」呢個字對某啲男士嚟講係大忌，不過不來梅前鋒艾列頓就一啲都唔介意。呢位喺德甲射手榜領先嘅巴西前鋒，日前自爆同朗拿度一樣，性愛係佢嘅入球動力。之但係不來梅慣咗喺周六比賽前一晚，即係周五晚集宿，咁點算？艾列頓就話：「無辦法啦，惟有喺禮拜五下畫『趕快完事』嘞。」
熱刺前鋒舒寧咸日前就同會方續約到下季尾，佢好有可能成為來季英超聯最「老餅」球員，因為聽講好似阿仙奴施文、曼聯白蘭斯同埋曼城舒米高等幾個老過舒寧咸嘅老將軍，踢埋今季之後都未必會同球會續約。不過舒寧咸攞呢個老將軍牌坊唔係無代價，據聞續約之後佢未必攞得番𠵱家三萬五千鎊嘅周薪。
逢周一至周五見報