今次真失敗，趙飛雲一直睇淡個市，只係擔心短期超賣，故決意等恒指反彈至9400水平先至再做淡友，點知等到頸就長咗，機會就失咗。
勝敗乃常事，最緊要識得從失敗中吸取教訓。今次過早沽出Put輪，賺少好多，再一次說明超賣中嘅反彈可以好細，甚至超賣再超賣，完全唔彈。老趙得到嘅第2個教訓，乃是不可太「孤寒」，前日見恒指彈上9331後冇力，都唔肯補番啲Put輪，係都要等見9400，結果就係差嗰少少，損失多多。
講番個市，恒指同期指昨日低位均見今個跌浪新低，形勢自然不妙。恒指收報9180，跌72點，期指大低水49點，相信係反映美國國務卿鮑威爾昨晚到聯合國，提交伊拉克藏有大殺傷力武器嘅新「證據」。不過，呢件事人人都知，鮑卿即使提出好有力嘅證據，市場嘅反應亦未必好大。
趙飛雲依然睇淡後市，但現在追沽已失先機，故此寧可等恒指反彈近10日線（目前在9373）先至郁手，對象依然係恒指Put輪9587同滙豐Put輪9588。
藍籌雖然唔掂，但國企繼續升個不亦樂乎，個別股仔也逆市而升。好似隻意科（943）咁，昨日就升近7.7%，成交亦見多咗，更間中見大牌攞貨。趙飛雲唔執輸，喺0.219元買多30萬股，帳面計叫做發咗新年財。據聞意科同某大公司有搞作，涉及重組，會帶來可觀嘅額外盈利，未來一兩個禮拜將有佳音。加咗注後，趙飛雲會將止蝕位推高至0.2元。
趙飛雲