農曆新年悶悶哋？嚟葵涌佔地8,000平方呎嘅大型玩具批發公司啦，由今日至農曆年初九（2月9日）止，首次舉行玩具開倉，由小朋友玩嘅毛公仔至大人玩嘅高達模型都有，更有女士們喜歡嘅Jenny公仔，售價由半價至3折不等，兼且簽卡重平過畀現金㖭。一於趁假期，一家大細嚟買心愛玩具喇！
記者：梁煒健
攝影：梁細權、梁煒健
ImageKids：妡析、君君、浚煒
唔講兒童玩具住，究竟成年人喜歡啲乜嘢玩具呢？高達Fans相信佔咗一大半，而收藏超合金嘅Fans一定人數相差無幾。近半年BANDAI復刻鐵甲萬能俠1號一次又一次，近月更生產多一個新型號GX-01R㖭，不過好搶手。家陣明滙企業老闆特別招呼本報讀者，搵咗40盒GX-01R做宣傳，想執平嘢嘅Fans早啲去買喇！
街價：$399
開倉價：$299
數量：每日限售10盒
今次開倉除咗照顧小朋友外，亦一樣睇住全港最多Fans嘅高達迷。有乜筍嘢？就係倉內所有高達模型，不論BB高達、HG、MG及PG，一律以模型嘅Yen價48算計。外邊一般以55算發售，家陣簽卡更平多1%，何況1:100嘅MG模型又有全城勁搶嘅高達RX-78KA版發售（但只限首日賣30盒），Fans又點可以唔嚟呢！
街價：$250
開倉價：$154
數量：限售30盒
繼爆旋陀螺後，喺電視催谷之下，𡃁仔一族又爆發玩《激鬥戰車》。自砌加強裝備嘅戰車後，小朋友就可以喺鬥盤內同對方撞個你死我活，把對方撞到散晒為止，認真刺激。由於家陣小朋友勁hit《激鬥戰車》，戰車已達15款，雖然今次開倉只有7至15號款，但就必定成為細路哥最受注目嘅目標。
街價：$59.9至$69.9
開倉價：$45
數量：400盒
呢個龍召機甲至啱小朋友玩。放入電芯後，可插卡於龍頭嘅卡槽內，幪面超人龍騎就可取得武器。每張卡均代表龍騎某一種武器，如佩刀、盾、終極武器等，每插卡入槽內均有不同聲響，十分盞鬼。
街價：$280
開倉價：$190
數量：300個
無論你係死硬派嘅超級HelloKitty迷，抑或只想買份平價玩具畀小朋友，相信呢套十分小兒科嘅HelloKitty熊貓火車絕對係你嘅選擇。由日本Toybox代SANRIO精品公司生產嘅熊貓火車，開啟後會於路軌攀山搬貨，非常有趣；全套火車軌約有3呎×2呎，現售$99，百貨公司肯定冇咁平。
街價：$299
開倉價：$99
數量：300套
幪面超人龍騎因有推出DVD產品，令一眾大人及細路都追住嚟睇。片中一班Riders及裝備，BANDAI均一一製成R&M系列嘅裝着變身figure，共10多款，係近期相當好玩嘅玩具之一。5吋高嘅figure活動性強，配件又多，何況家陣平咁多，唔儲齊都唔得。
（左）DX電單車 街價：$299 開倉價：$190
（中）龍騎＋赤龍 街價：$249 開倉價：$120
（右）Knight＋電單車 街價：$299 開倉價：$190
數量：每款500套
聽講早幾個月前有間玩具店開倉，同樣有賣TAKARA呢類1:6Jenny着衫公仔，反應奇佳，數日售清。原來該批貨就係今次開倉嘅主辦單位所擁有，而今次搞得更大型開倉，Jenny及30年代衫款嘅Licca's公仔就更加多款、平、抵！
（左）婚紗Jenny 街價：$180 開倉價：$99
（中）30年代Licca's 街價：$200 開倉價：$90
（右）校服Jenny 街價：$99 開倉價：$50
數量：每款200套
呢處有過100款貨品發售，所以要鎖定目標嚟掃貨，如果要買大盒高達模型，應要睇吓自己攞唔攞得到。今次開倉以幪面超人龍騎R&M系列產品、高達模型、萬能俠合金魂啱大人玩，小朋友就重多種類。今次開倉除可畀卡唔收charge，簽卡更可平多1％優惠（要購滿$150才可簽卡），小記真係從未見過有咁好嘅着數。
明滙企業公司
電話：25812282
地址：葵涌和宜合道167-175號金威工業大廈二期22樓E座
開倉日期：即日至2月9日
穿梭巴士時間：中午12:00至下午5:00
接送地點：葵芳地鐵站葵涌廣場正門等候
註：現金及簽Visa均可，簽卡更可平多1％