做咗局長夫人，認真唔同。好似息影女星胡慧中咁，自從做咗民政事務局局長夫人，當堂由娛樂界跳入政界，新正頭嘅見報率同老公何志平有得揮。
噚日朝早，胡慧中着到成隻雀咁去大埔嘅蘭花展，一講到何局長前幾日為香港求咗支下籤，就即刻為老公講好說話，話求籤只係一種儀式同風俗：「唔通求咗支好籤，就會有錢跌落嚟？」咦？乜同董太初三講話一模一樣嘅？
到下晝，局長夫人又趕出中環，陪何志平去中環俗稱「蛇竇」嘅樂香園咖啡室閣樓，同八方等一班行家團拜。經過朝早一輪熱身，胡慧中上足電，一到場就大派利是，聽到有人祝佢連生貴子、三年抱兩都不知幾開心。已經有一個兩歲囡囡嘅胡慧中，都忍唔住話想生多啲，至於係咪想生夠一隊足球隊，佢就認真唔客氣，望住局長話：「佢邊得呀！」有人馬上問何志平，點可以令老婆三年抱兩？何局長倒也坦白：「呢個係好粗重嘅問題！」後來佢澄清，話係湊仔好粗重啫。
講番局長夫人，佢喺咖啡室又再講起求籤，話當日都諗過有可能會求得下籤，所以佢同局長嗰朝都搵碌柚葉沖過涼，上埋香先出街。
八方奇怪，局長係虔誠基督教徒，喺屋企裝香？何局長新聞秘書事後查問清楚，原來夫人真正意思「只係心理上沖咗涼同裝咗香」。咁都兜得番，真係高手。
（圖）着到紅彤彤嘅何夫人胡慧中派利是畀記者，何志平（左）惟有做佢背後嘅男人。
傳真︰2623-9278
電郵︰