講嘢一向大膽又幽默嘅黃秋生，日前接受內地報章訪問，大事評論同佢合作過嘅藝人同導演。秋生話喺佢朋友之中，鎮宇無論拍戲定係現實，都令佢最睇唔透。佢唔敢同鎮宇一齊做戲，因為鎮宇做戲冇規則，好難應付。至於私底下，秋生就話鎮宇似女人，又似個怪人，平時根本唔會將心底話講出嚟。佢飲醉酒時會周圍搗亂，畀麻煩朋友，就好似個小朋友，不過都幾可愛嘅！
秋生又講到自己嘅片酬比劉德華少好多，開支又大，個仔又要返學，接咁多爛片都係迫不得已，佢重話華仔同鎮宇做到嘅角色佢都做到，但係自己做嘅角色佢哋未必做得到，好似《人肉叉燒包》嘅變態佬咁，佢哋未必應付到。
秋生憑《野獸刑警》榮膺影帝，不過佢就大彈齣戲嘅導演陳嘉上，秋生用普通話講：「導演風格跟性格有很大關係，陳嘉上有時拍戲會亂，搞不清自己想要甚麼。」
焦媛自資搞嘅舞台劇《赤 禁室》噚日開記者會，焦媛重即席做咗段情慾戲，睇嚟佢用咗好多心機。佢就話用佢半生人嘅積蓄盡地一煲，今次呢套舞台劇比上次《蝴蝶春情》嘅意識更大膽。
焦媛一講到高志森就耍手擰頭，佢話：「唔好幫佢宣傳啦，感情事唔講，講晒套劇啦！」
問焦媛會唔會送飛畀高志森睇，佢話：「想睇就自己買飛入場啦！唔係，我嘅意思係我屋企人都自己買飛啦！」咁樣焦媛咪當高志森係自己人？焦媛即刻話：「唔同，屋企人都分好多種。」咁高志森係邊一種呢？
由劉德華同張栢芝主演嘅賀歲片《老鼠愛上貓》大年初一開始喺內地上映，初一至初三票房累積有成五百萬人民幣（約四百七十萬港元），成績唔錯。
曾經同好多男明星好似古天樂、周星馳合作過嘅張栢芝，今次就同華仔結片緣，佢重大讚華仔工作認真，為練武功可以覺都唔瞓，重好悉心指導新人，雖然今次拍戲時北京天氣好凍，拍得好辛苦，不過栢芝就話好值得。
吳綺莉早排接受港台節目錄音訪問，佢話新年會去上海，因為唔想喺香港派利是。對於早前聖誕時有報道指佢同個男人好親密咁喺銅鑼灣行商場，吳綺莉噚日就澄清嗰個人一定唔係佢，佢聖誕根本冇返香港。
問吳綺莉𠵱家有冇人追？佢話𠵱家要揀嘅係結婚對象，最緊要大家夾，不過一切隨緣喎。
葉童噚日喺清水灣電視城拍攝新劇《撲水冤家》嘅宣傳短片，拍慣電影嘅葉童今次係第一次幫無綫拍劇，佢為咗力求完美，出動咗成百幾套私伙衫、鞋同埋首飾。
套劇開拍嘅時候已經話葉童個角色影射章小蕙，葉童話拍咗兩個月已經多咗兩箱衫，唔怪得章小蕙要搬大屋啦！
