臨近情人節，自稱仍未拍拖的蕭正楠和李蘢怡，不約而同大歎恨拍拖，而這惺惺相惜二人組，日前更以情侶檔姿態大晒Swatch情侶表及飾物，他們在感染浪漫氣氛之餘，還許願天下有情人珍惜身邊人。
蕭正楠（Edwin）及李蘢怡（Tiffany）明日將為Swatch舉行的活動擔任嘉賓，屆時二人會分別以「宇宙之王」及「原野女神」造型亮相，展示Swatch新款情侶表及「愛火花」系列飾物。
日前Edwin及Tiffany在金鐘一間酒店內，率先以情侶檔姿態展示Swatch部份飾物及手表，雖然二人均異口同聲表示沒有拍拖，但他們在拍照時打情罵悄，又拿着愛情標靶掟磁石飛鏢，驟眼看這對「小情人」又確實幾甜蜜。
中、西情人節將至，Tiffany和Edwin屆時各有各忙，他們均表示不擔心會看到情侶雙雙對對，而自感形單影隻，Tiffany笑說：「我到時會喺海南島，宣傳我早排拍嘅一套內地劇，咁我可以對住啲椰樹過節。」話雖如此，其實Tiffany亦好恨拍拖，她說：「我恨㗎，冇愛情滋潤，𠵱家個人都幾乾吓，我唔知𠵱家算唔算有追求者，異性朋友一定有，唔知有冇發展可能，佢係圈外人，咁大家都有出吓街嘅，但始終都係以工作行先。」
Edwin則說：「情人節嗰日我要做兒歌節目，我都好想拍拖，但冇得拍，入行前我有個女朋友，佢係一個好典型嘅結婚對象，可惜我入行之後，畀唔到時間對方，所以分開咗，我唔入呢行嘅話，同佢應該可以好長遠，可惜㗎，雖然自己冇拖拍，但我都願天下有情人，珍惜身邊人。」
此外，Edwin前晚於旺角一間酒家出席MusicNation開年飯局，旗下的歌手包括陳驊（Kenn）亦有出席。兩人不忘參與賭局一發新年財，結果阿Kenn贏了千多元。
採訪：朱芷瑩 攝影：甄朝健
場地提供：金鐘香格里拉酒店
