羊年股市第2日繼續跌，恒指冇咗72點，呢鋪係跟美股走。和黃（013）賣歐洲嘢，估計可袋利潤近20億，但股民唔領情，散1.30元，收47.30元。本來建議以43仙價錢收集和黃Call輪9666，隻輪昨收42.5仙，已經到價，不過以正股昨日咁嘅跌幅，9666未買得住，跌唔夠，即使正股彈番些少上去，隻輪亦都未必可以有升幅。
恒指收9180，可以開始諗吓收啲恒指Call輪，先係細細注，預咗恒指萬一回到9千，再溝平啲，等彈番上9300以上散水。近期對象係9553，下月杪夠鐘，現價12.3仙；稍為遠期嘅對象係9663，6月杪夠鐘，現價10.3仙。9553溢價較低，輪價變化會比較跟貼正股，即係話波幅會比較9663大。
太A（019）近排成為硬淨之星，大行頻頻出報告話抵買，應有較大抗跌力，昨收32.40元，逆市企定。太ACall輪9475收16.4仙，升2.5%。吼住太A回軟時收集啲9475，譬如話喺15仙以下買入。隻輪5月夠鐘，現價16.4仙，溢價6.5%，槓桿率19.8倍。
九倉（004）呢排亦算硬淨，現價15.60元，估計守得穩，留意買隻九倉Call輪9476，6月到期，現價18.8仙，溢價1%，槓桿率8.3倍，數據唔錯。
章盛