年屆六十七的曾江近期除客串演出台灣劇《流星花園II》外，更有份在荷李活猛片《新鐵金剛之不日殺機》中，飾演北韓軍官，還要大講韓文，最終要睇「貓紙」過關。原來曾江曾為第一代占士邦辛康納利主演之《偷天陷阱》試鏡，可惜失敗，今次曾江終與現任占士邦皮雅斯布士南結片緣。
曾江日前接受本報訪問時表示，其實早在十多年前已加入美國演員公會，為不少荷李活猛片試鏡，可惜試鏡未能成功。曾江說：「試鏡唔成功唔等於你唔好，只係唔適合啫。記得早年辛康納利喺吉隆坡拍《偷天陷阱》，我一直好想同佢合作，後來終於有機會為一個好重要嘅角色試鏡，但最後都casting失敗。」
未能跟首位占士邦辛康納利合作的曾江，竟在多年後的今天，跟現任占士邦皮雅斯布士南在《新鐵金剛之不日殺機》做對手戲，曾江心情興奮之餘，亦感到無窮壓力。曾江說：「皮雅斯好熟啲對白，如果同佢做對手戲唔熟對白，唔單止影響部戲，而且重會令人覺得香港演員好渣，影衰晒啲香港演員。點解導演唔搵韓國人做我個角色，要搵個香港人去做啫？就係覺得你適合之嘛，所以我咪要好勤力做功課，學韓文囉！
「唔單止每個發音都要記，重要記埋個意思㖭，日日返去聽錄音帶，講到我一口泡，到正式拍攝時，竟然個腦一片空白，乜都唔記得晒，結果要出動貓紙先至搞得掂。」
說到接拍《流星花園II》的原因，曾江不諱言是基於好奇心，他說：「我唔明點解言承旭呢個𡃁仔會咁紅，咪索性去睇吓佢點解咁紅囉。
「見到之後就明白啦。佢真係幾靚仔，就算老遠望埋去，都已經有星味，做戲都唔錯，對我哋呢啲老人家又尊重，聽教聽話。不過佢未埋位就一定瞌眼瞓，我問佢點解，佢就話冇辦法啦，已經兩日冇瞓過覺啦。呢樣嘢我明白㗎，以前偉仔（梁朝偉）拍《鹿鼎記》，都試過六個月冇返屋企瞓過覺啦。」當然，昔日粵語片當紅小生曾江又何嘗未經歷過這些艱苦日子！
採訪：戴彩煥
攝影：仇志德
場地提供：柏寧酒店George&Co酒吧
