八方噚日講完馬時亨戴住條羊呔，可能唔多「老利」，咁啱又碰到肥仔馬，佢話自己係基督徒，所以百無禁忌。其實除咗舊年細價股事件之外，講落佢都幾好彩，舊年七月上任之初被迫沽晒手上逾七百萬股電盈股票，避過電盈跌穿一蚊嘅慘痛日子，一來一回差成幾百萬，好過做兩年局長。噚日，佢又同八方講另一個好心變好彩嘅經歷。
話說九五年肥仔馬個妹喺外國回流返港，正為尋覓居所而煩惱，肥仔馬於是買咗天水圍嘉湖山莊一個複式單位，解決細妹嘅居住問題，但住咗兩年後，個妹話離市區太遠，都係要租番喺市區。
當時九七年樓市高峯期，肥仔馬費事丟空間屋，索性賣咗佢，咁就避過樓市大跌，重賺咗差唔多一個開。唔知佢呢啲好運，可唔可以帶挈香港經濟走出谷底？
傳真︰2623-9278
電郵︰