纖體成風，不少老、中、青女星，都紛紛向外展示纖體後的勁Fit身材。最近陳淑蘭亦不甘示弱，大騷其美腿和纖瘦身形。不過最令人羨慕的，是她那一身白滑的肌膚，所以當然要趁機問問她的護膚心得。蘭子認為護膚最緊要夠天然，而所有生果都一律是她的至愛，不過最重要的還是：「要保持心境開朗！」
記者：羅惠芬 攝影：黃子偉
本身好貪靚的陳淑蘭，有一段時間乜都敢試，例如爭住試別人覺得好的護膚產品，又試過學人食胎盤素。不過，最大鑊的一次，是用護膚品用到爛面，足足用了一年時間來醫治。
「嗰次用咗啲傳銷商嘅護膚品，因為朋友話有換膚作用。但我一用就成塊面出晒粒粒同紅疹，變到好恐怖。」最後她要食足成年醫生開的避孕藥，靠改變體內荷爾蒙才慢慢痊愈，不過皮膚就再難回復以前般白滑。
這個經歷令蘭子對試新嘢怕怕，用慣邊隻產品好就唔再輕易轉，就算試都只會揀天然產品，貪其傷害性低。
祖籍上海的蘭子，天生皮膚白滑。不過，女孩子對「白」的要求永不會滿足，她依然會試好多美白方法，重會自己DIY，用最慳錢的方法令自己靚靚。
1.檸檬粗鹽磨死皮
粗鹽可以當成天然磨砂材料，相信好多人都知。蘭子就覺得，最好加埋檸檬一齊用，可以去死皮兼美白。她會將一個檸檬沾上粗鹽，然後直接在手踭、膝蓋及腳踝位摩擦，因為這些地方的皮膚通常偏黑，用檸檬就可以減淡黑色素。
2.米水洗面
以前都聽阿媽提過，話用洗過米的水洗面，效果好好。現在，蘭子就大力推介這個潔面方法，因為米含有氨基酸、無機鹽、糠油、胚芽等成份，不但可以去除面上多餘油脂，還有美白作用。最好用第一次的洗米水清洗面部，之後再用清水洗乾淨。由於洗米水不含任何防腐劑，加上性質溫和，所以特別適合敏感性皮膚人士用。這個方法慳得來又有效，大家不妨試試。
畢竟不再是十八廿二，蘭子說唔可以再單靠DIY護膚。「始終皮膚的抵抗力愈來愈弱，一定要靠刺激性強嘅護膚品幫補一下。」
Borghese眼膜
「佢唔止可以去眼腫，重有好好的美白功效，真係可以減退黑眼圈。」
LauraMercier打底霜
SK-II美白粉底
蘭子最怕曬太陽，所以就算唔化妝，她都會搽個Base阻隔紫外光。佢推介LauraMercier打底霜和SK-II美白粉底，鍾意前者搽完好有光澤，後者就夠潤兼持久。
MicroPlus纖體霜
經常受水腫問題困擾的她，最近得琦琦介紹，用了MicroPlus的纖體霜。佢話用咗兩個多月，工人都話佢PatPat細咗。
蘭子是個愛狗之人，家中有5隻狗，屋企每天不但嘈到拆天，更經常有陣異味。所以她會在家裏燃點香薰油辟味，她說自己最愛薰衣草的味道，每次聞到，成個人都會好Relax。
坊間有不少天然美白方法，功效未知怎樣，惟有請扮靚經驗豐富的蘭子即場驗證。
1.白茯苓＋蜜糖
製法：買一両白茯苓，可叫藥材舖代磨碎成粉末，分五次用。每次加適量蜂蜜調成膏狀，敷約20分鐘，然後用清水洗淨。白茯苓有減輕皮膚黯沉色素的作用。
蘭子評語：「就咁搽啲白茯苓喺皮膚上面，已經可以見到即時白咗。不過啲白茯苓一定要磨得很碎，先可以滲入皮膚。」
2.蛋白溝檸檬汁
製法：把適量檸檬汁加入蛋白，攪勻，敷約15分鐘後洗面。
蘭子評語：「檸檬汁一向都有美白作用，不過我永遠唔會單獨使用，以免其酸性會對皮膚起副作用。呢個方法嘅美白效果唔錯，不過個人唔太鍾意用蛋白，感覺幾黐𣲷𣲷。」