雖然美國話打仗，但炒家冇理由因此停手，既然如此，大家就將注意力放在唔多受外圍影響嘅中資股身上，細價股亦無視外圍形勢，繼續炒作。
靚女叫小初留意吓隻意科控股（943），話自從佢向文化傳信（343）買咗個中文2000項目後，股價已開始好轉。其實間公司自從換咗人打理後，有唔少新計劃，聽講佢最近搞緊重組，短期會有公布，消息會利好股價咁講。小初睇返意科嘅股價圖，似乎真係有料到，由過年前起已經成交增加，噚日更抽上7.69％，收0.224元，幾乎係近半年高位，而成交亦增至171萬銀。
靚女話，意科向文傳買嘢，係以發新股支付，發行新股數目又剛好係唔夠10％唔使申報，加上文傳以往的炒作往績，話意科有得炒作，一啲都唔奇。
另外，新年流流又有股仔股價急跌，噚日隻曼盛生科（512）就跌咗16.9％，收0.157元，經紀陳話，只係公司早排低位配過新股，接貨者現價沽貨而已。
慕容小初