羊年來到買咩好？之唔係羊咩咩囉！印象中，雖然好少有卡通人物以羊咩做主角，不過踏入羊年，坊間開始多咗唔少羊咩擺設出現，好似被女孩子視為閨中密友的羊咩毛公仔、開運招財的意頭羊咩擺設、既實用又美觀的羊咩時鐘同除臭羊咩香包，統統都趁住羊年同大家見面，有咁多得意羊羊陪你過年，今個羊年重唔洋洋得意！
記者：尹珊珊 攝影：陳穎、陳陶鈞 ImageGirl：Irene
逢星期一至四刊出
在十二生肖裏面，論溫馴睇怕都非羊仔莫屬，好似呢個一家三口的羊咩家族，無論係混啡白色長毛，抑或混灰白色長毛，個樣一樣咁溫柔敦厚，長而鬈曲的毛毛觸手柔軟，再加埋滿身肥肉（棉花），攬住佢瞓覺一定好舒服。
老實講，羊咩公仔純則純矣，卻老是予人有種笨鈍的感覺，又點及得上狗仔貓仔咁精靈，不過呢隻戴上眼鏡的羊咩就唔同，個樣精明又醒目，再加埋襯到絕的綠色Cap帽同靴仔，唔知可唔可以令你從此對羊咩改觀呢？
呢隻羊咩女可謂名副其實的純情小羔羊，佢唔單止綑有非常女性化的啡色蝴蝶結，重配合埋一臉無辜的表情，有種我見猶憐的感覺，令愛心爆棚的女孩子都恨不得立刻將佢抱入懷中，呵護一番。
水晶擺設一向自有捧場客，好似呢個晶瑩剔透的山羊水晶，造型極之優美，盡顯了山羊動感和活躍的神態，在光線的折射下，閃爍出如鑽石的光芒，由於此品牌之水晶有收藏價值，故身價過千仍物有所值。
呢隻掌門羊之所以咁熟口熟面，事關佢咪就係超級無敵掌門狗隻黑羊囉！唔好睇佢生成身粗腳幼咁古怪，其實一開掣就即刻識行識叫，初初推出曾經炒至八百幾蚊隻，𠵱家雖然售價回落，但貨量唔多，剩番不過幾隻左右，Fans們要買趁手。
以陶瓷製成的福壽羊，金銀兩色有金銀滿屋的寓意，成雙成對並列在充滿日式風味的屏風上，更顯得格外精緻。
唔少生意人都鍾意買隻招財貓看門口，趁住今年羊年，有呢隻大白羊或者呢對小白羊幫你鎮守大本營，唔單止開運招福，分分鐘重可以保佑你接到大生意，財源滾滾來。
用滑毛料製成的祈福羊，摸上手輕柔軟熟，留意羊仔的神情一臉虔誠，再加埋雙腳跪地的動作，夠晒神心，吸啜在汽車的擋風玻璃窗上，又或是掛在窗前，今年願望必有所成。
如果閣下乃篤信西洋十二星座學說的星座迷，呢套十二星座羊咩咩就最啱你，每個星座羊各自有唔同顏色，並代表了唔同意思，好似黃色的雙子座羊咩有招財作用，灰色的金牛座羊咩有助辟邪轉運等，雖然唔可以擔保一定有用，但求平平哋可以買個安心。
老媽子教落福字揮春要倒轉擺，呢隻名叫福倒羊的羊咩咩，同樣都要倒轉放，只要將羊仔反轉後擺番正，便會發出咩咩咁聲，雖然聽落似牛叫多過羊叫，但總算意頭十足，肥嘟嘟的粉紅羊亦甚有福相。
呢個羊咩頭時鐘既可裝飾又有實際作用，揭開背後可調校時間，如果驚擺得耐勁吸塵，重可以將鐘芯拆出，清洗毛毛外層，但衰在不設響鬧功能，如果唔係就更加實用。
咪睇佢個樣就以為係一般羊咩公仔，其實佢肩負了吸濕、除臭、芳香三大功能，只要將羊咩們分別放入鞋櫳內，便能將千年鞋臭味一一辟去，同時內藏的香包重會不斷散發薰衣草香味，當香味揮發得七七八八後（約1個月），可於大型日式百貨公司購買更換裝替換。
想同心愛的羊咩咩日對夜對，不妨將呢條吊有立體羊咩公仔的電話繩，扣在手提電話上，共有四種唔同顏色可選，方便配襯唔同型號的手提電話，要隨時隨地望到羊咩就話咁易啦！
地址：旺角彌敦道580A號潮流特區3樓27號舖
電話：23807792
地址：旺角彌敦道580A號潮流特區2樓2號舖
電話：23855884
地址：尖沙嘴加連威老道54b地下嘉蘭圍
電話：23121008
地址：尖沙嘴嘉蘭圍5-11號利時商業大廈104號舖
電話：23666718
地址：銅鑼灣記利佐治街19號地下
電話：29722198