眾所周知，警隊傳統係拜關二哥，祈求乾坤正氣，保佑警隊除暴安良，但原來有警署例外，你估係邊間？答案就係黃大仙警署，至於呢間警署唔拜關二哥改拜乜嘢呢？咁當然係出晒名有求必應嘅黃大仙啦！
黃大仙警區阿頭江張嗣蘭同八方講，因為區內有黃大仙廟，所以呢個警署亦入鄉隨俗，改為供奉黃大仙，重成為黃大仙警署特色之一。佢哋供奉嘅黃大仙像放咗喺警署飯堂對出一個活動室，擺放黃大仙像嘅神樓，睇得出係經過一番修飾，神枱設計好似一間廟，兩旁放有新鮮菊花同兩碟橙，不過就冇籤筒。
咁警署裏面有冇夥計自備籤筒，得閒向黃大仙求番支好籤？Madam江就賣個關子，唔肯多講。
八方喺度諗，沙田車公廟咁出名，唔知嗰區嘅警署又會唔會改為供奉車公呢？於是打電話去沙田警署、田心警署、小瀝源警署同馬鞍山警署八卦吓，有警務人員話佢哋都係拜關二哥，冇拜車公，警署亦唔會喺車公誕拉隊去車公廟拜神，但係啲夥計有冇自己個別去求神就唔知囉！
傳真︰2623-9278
電郵︰