春節係代理行全年唯一關門休息嘅大日子，經紀都好珍惜呢幾日黃金假期，好好休息吓。不過，美聯物業會景閣分行客戶經理劉敏嫻，喺呢個新年就好唔得閒，大年初一收到中半山愛都大廈個客張票，但係業主去咗台灣過年……
為着做成單生意，佢二話不說，即時買機票，飛過台灣。點知當日無機位，最快要初二早上。
到飛嗰日，佢孤伶伶一個喺候機室，見到人地一家大細，歡天喜地去度假，不禁諗起往年，同屋企人開開心心拜年嘅情景，真係好想擰轉頭返屋企。
最後，佢梗係成功交咗張票畀業主，促成呢單二千幾萬嘅大額成交。
嗰晚夤夜趕返香港，但係，落機已經十一點幾，終於都趕唔切同屋企人食開年飯！不過唔緊要，做成呢單生意，點都有十零萬佣落袋，可以同家人食餐勁，補番數。
恒基地產噚日臨時call咗個「三羊啟泰」記者會，頒獎畀初一至初三，促銷最多恒基樓盤單位嘅香港置業。個記者會揀喺下晝兩點半至三點左右舉行，恒基營業部總經理張炳強話呢個係好時辰喎！聽佢同事補充，噚日喺羊年立春日，下晝一點到三點係立春之時，代表正式踏入新一年，係吉祥之兆。
恒基首創喺維園年宵擺檔攤，賣印有集團logo嘅鎖匙包兼派樓盤宣傳單張。蘭西喺年初一凌晨兩點鐘行經，見到燈火通明，但個檔攤已經「吉」晒，睇嚟生意都唔錯，幾個職員就繼續留守，並冇蛇王走咗。
過年前，蘭西講過，大角嘴港灣豪庭業主，自設咗個屋苑網頁。之後收到讀者嘅e貓，話長沙灣泓景臺業主，亦做咗個網頁，內容重好正，叫蘭西登入去睇一睇。
蘭西本住求知精神，自然要睇吓啦。呢個網站嘅資訊果然幾詳細，部份資料相信好多人都有興趣，就係屋苑嘅銷情。每一座都以一張價目表形式，刊登已售出單位嘅成交價，咁大家就好容易數到個盤賣咗幾多個單位，同埋計到呎價。
另外網頁重有一欄係泓景臺同隔籬嘅昇悅居大比拼，包括每座售出單位數目，同埋每座嘅最高、最低同平均呎價，一目了然。若有興趣，可以登入上面個網址睇睇。
農曆新年假期啱啱過去，太古地產同希慎興業，不約而同都喺今日有新春舞獅表演，太古就喺金鐘太古廣場商場舉行，希慎梗係喺自己地頭銅鑼灣希慎道啦。
太古喺上晝十一點半舞獅，希慎就係十一點；唔知佢哋係咪都睇過通勝，查過呢個係好日子同好時辰呢？蘭西查過，今日原來宜祭祀、動土及開市。
另外，新世界喺尖沙嘴嘅新世界中心就揀咗年初八（2月8號）舞獅表演，原來嗰日都係宜開市。其實發展商搞呢類活動都係希望攞個好意頭。
蘭西
電郵地址：
