拉素今屆嘅「逆境求生，拼搏精神」最令我求大俠欣賞，但估都估唔到呢個座右銘可能救埋巴塞隆拿，因為剛加盟巴塞嘅前拉素左路球員蘇連，已經急不及待將呢種積極思想灌輸畀巴塞；重好唔客氣咁同啲巴塞隊友講，要拯救球隊就要靠球員自己。
你可以話蘇連大口氣兼懶醒，同巴塞班大佬球員咁講嘢，但係我求大俠就好受落，因為只要你睇過佢哋班波重散過「蛋散」時，真係唔鬧嗰個都唔係巴塞擁躉。蘇連強調每支球隊總有低潮期，最緊要係球員本身去做救世者，去為每一次搶球悉力以赴同克服一切困難。
之不過如果巴塞班人唔接納佢嘅苦口婆心，令拉素精神都救唔到巴塞嘅話，咁真係與人無尤嘞。
季中轉會市場就已經關門大吉，但係自由身球員就唔受限制，好似上星期先至宣布話退休嘅波錫，就傳出正畀熱刺力爭羅致，解決羅比堅尼受傷缺陣問題，如果消息屬實，雙方有意利用轉會市場條例嘅灰色地帶不足為奇。波錫用到退休呢招「釜底抽薪」，我求大俠都要寫個「服」字！
占士近年一直都有機會成為英格蘭國家隊首席門將，但係由佢把關嘅韋斯咸今年超聯成績之差唔使多講，失球之多認真驚人。不過，占士就認真「閃」得快，話係俾班後防隊友所累，重話驚會因此無得踢國家隊。其實，占士今季表現唔使我求大俠講大家都知，有好多失球佢都要負責任，咁樣話啲隊友都真係幾無球品喎！
同巴塞隆拿一樣，利華古遜係國內聯賽認真唔掂，已經身處護級邊緣，教練托比慕拿更加收到球會方面指令，要爭取成績避免降班。利華古遜九九至○○年度球季只差一步就可以問鼎德甲聯賽錦標，估唔到短短幾年搞到如此地步。不過，話晒呢隊波人腳班底唔錯，我求大俠都唔想見到佢哋季尾降班，惟有祝佢哋好運啦。
意大利聯賽會下個禮拜就會傾係咪將意甲增加到四十隊角逐，國際米蘭會長莫拉堤就第一個企出嚟反對，佢用恥笑口脗話如果改制只會變成一個大規模嘅意大利盃，失咗聯賽意義。我求大俠認同佢講法，意大利聯賽係咪沒落見仁見智，但起碼重係歐洲三大聯賽之一，有冇需要咁革命性嘅變化呀？