樓上Cafe已經唔係乜嘢新鮮嘢，不過，如果一邊夾Band、Jam歌、跳舞之餘，又可以一邊同三五知己摸吓杯底、傾吓偈，又的確幾盞鬼。於是，Queenie就諗到開間私竇「NineLives」，有跳舞室、Band房同露台小Cafe，而且只收十幾蚊嘅飲品錢，所以連《少林足球》嘅四師弟小龍都話：「好過去Band房！」
記者：劉耀祥 攝影：林栢鈞
逢星期一、三、五刊出
「NineLives」店主Queenie是個愛貓之人，就連店名都要用「九條命」為名，甚至整間「NineLives」處處有貓的蹤影，不論招牌Logo、卡片、櫃內裝飾，甚至牆上壁畫都有大大個「貓樣」。
不過唔係愛貓之人都可以欣賞吓個「綿羊櫃」，全部HandMade綿羊，唔單止可以睇，睇啱嘅話Queenie更可以割愛，價錢就由$49到$149都有交易。Queenie更會每日都輪流帶家中的三隻貓返店「看舖」，所以就被笑稱為「貓保安員」。「之前呢度只係有個跳舞Studio，其他地方就係寫字樓，之後就改建成小Cafe同埋露台雅座。」店主Queenie說。
「NineLives」開設於尖沙嘴商業中心內，自成一國之餘夜晚都唔怕會嘈親人，中央大廳位置就係Band友夾Band位，想聽吓LiveBandSound嘅話大可以坐低慢慢欣賞，睇到技癢嘅亦可以即時一展身手，就算三唔識七都可以夾吓Band，加上場內放有全套鼓以及兩支電結他任你玩，分分鐘就連租Band房錢都慳番。採訪當日《少林足球》四師弟小龍陳國坤就正與朋友夾Band，原來小龍除咗踢得一腳好波之外，重打得一手好鼓㖭。「上嚟玩咗都有個零月，感覺好Private，打到攰就可以飲杯嘢唞吓，同埋呢度冇酒賣，夠晒健康，好過去Band房。」
若果嫌BandSound太嘈，亦可以走出露台雅座，雖然只有一玻璃之隔，不過就已經可以與室內BandSound隔絕，最適合三五知己談天說地風花雪月一番，甚至乎可以拎支木結他，齊齊Jam吓歌，再歎番杯特色飲品或小食。加上露台四周都有帆布擋隔，採訪當日只有12度，都唔覺得凍。而且露台雅坐內更設有電視及VCD機，就連大富翁、UNO、層層叠等棋類遊戲都有得供應，就算冇偈傾都一樣唔會怕悶。
由於店主Queenie乃是舞蹈員出身，所以「NineLives」內更設有舞蹈室，可以舉辦跳舞課程，當然嚟到想跳舞亦一樣無任歡迎，甚至想學跳舞或者樂器，Queenie亦都可以安排導師。而這個舞蹈室比其他舞蹈室特別的地方在於裝有燈光效果，所以搖身一變亦可以變成Disco，所以搞Party亦能夠勝任自如。據Queenie所講，這個舞蹈室亦可以變成會議室，最適合團體搞Function或者開會。
「NineLives」實行會員制，每位入會費要$20，之但係隨後收費就相當「驚人」，因為不論你坐幾耐，夾幾耐Band或者捉幾耐棋，都完全免費，只係收番飲品同食品錢，隨時都係十零蚊就玩足幾個鐘，重抵過去網吧。
地點：九龍尖沙嘴柯士甸路二號三樓
電話：31562351
開放時間：2:00pm-11:30pm（周一至周四、周日） 2:00pm-2:00am（周五至周六）
網址：