萬人迷木村拓哉喺藝能界打滾咁多年，果然係人都畀面佢。同木村拍緊日劇《GoodLuck！！》嘅演員見木村太座工藤靜香懷嘅小木村二號就嚟出世，所以已經部署好，只要靜香個肚一痛，無論幾趕戲都好，全廠人都會合力速遞木村去產房。
我羅拉八到木村其實好想靜香今次生仔，可能佢實在太興奮，所以平日喺片場好少講私人事嘅佢，近日係咁迫人聽佢再為人父嘅心聲。因為木村喺屋企唔敢食煙，所以𠵱家日日喺片場都煙不離手，佢又話一定要好似上次愛女心美出世咁，去產房拍低老婆嘅生產過程，重一早訂番上次一晚過萬港紙嗰間醫院豪華靚房。
雖然木村拍戲同啲演員好易friend，但凡事總有例外，大家都知佢唔妥井川遙，木村話佢演技完全唔掂，而且未紅先驕，之後大把電視台人員都附和埋一份。日前就連井川嘅事務所都承認井川唔係太適宜做戲，想效法山口智子專注拍廣告。但講真，井川同山口，江湖地位差好多皮喎！