麥浚龍（Juno）昨日為搶波鞋活動任嘉賓，對於譚詠麟與李克勤暗寸他聘請職業fans，Juno表示絕無此事，還指二人並非在說自己。而昨日Juno的歌迷十分瘋狂，為吸引Juno注意，他們更狂拍店舖玻璃。
麥浚龍昨日到銅鑼灣時代廣場內的波鞋店出席任搶波鞋活動，店外一早有數十名歌迷等候偶像出現。Juno遲了十五分鐘才到達，一到場便即席示範如何在店內搶波鞋，在店外的歌迷不時大叫，更有歌迷拍打店舖的玻璃，吸引Juno的注意。
Juno對於歌迷如此瘋狂，他解釋：「我哋好耐冇見，因為我啲歌迷都要陪屋企人，咁我就要錄音，平時我哋差唔多日日見，因為我之前每日都有活動，呢幾日淨係見過一次，所以就瘋狂啲。」
最近譚詠麟與李克勤在演唱會中暗寸Juno聘請職業歌迷，懂唱歌的就有四百元，追車就六百。問Juno會否介意又再被人揶揄請職業歌迷？他說：「佢哋都唔係話緊我，大家太敏感，我都出道一段時間，大家都可以睇到我啲歌迷係咪真嘅，我自己就冇請職業fans，我亦都冇唔開心，佢哋喺演唱會提到我，都幾好呀。」
問Juno會不會看阿倫及克勤的演唱會？他說：「有時間我都會問公司有冇飛，不過聽講話演唱會好爆。」
