由年廿九餐團年飯開始，餐餐都大魚大肉，肚皮開始吃不消，我諗係時間要清清腸胃。自問食得奄尖的我，雖然唔抗拒食齋，不過就略嫌齋菜單調乏味，諗起朋友前陣子介紹的新派齋菜，喺新年期間特別推出十幾款意頭佳的新春菜式，外形與味道都盡得葷的神髓，有肉味又可清腸胃，一舉兩得。
記者：辛汀
攝影：Manny
登品素食府的裝修不算豪華，但菜式勝在特別，這裏的素菜以台式為主，以創新、多元化為賣點，大部份齋菜的外形和味道都能以假亂真，難怪平日吸引到唔少港人專程到此光顧。
驟眼睇真的以為是乳豬全體，其實只不過是大廚的魔法，大廚將魔芋、麵筋等材料混合，再用上燒烤的烹調方法，做到形神俱似，若在雙眼換上紅燈膽，就更加活靈活現。沒有肥膏的素乳豬片，外皮脆卜卜，入口鬆化，味道與乳豬皮無甚分別，不過我就鍾意將乳豬片蘸上醬料後，再夾着薄餅一齊吃，減低燒烤後的油膩感覺。
外形、口感都達到以假亂真的日式龍蝦刺身，以長江源頭的魔芋製成，薄薄一片的刺身，紅白相間，色澤晶瑩剔透，的確令人食指大動，配以正宗的日本豉油和芥辣，食在口中鮮甜爽滑，口感一流，而且含豐富維他命的魔芋有助清理腸胃。
俗語說，春江水暖鴨先知，寓意春到人間，迎春接福，所以好多人在春節期間都愛吃鴨，眾多以鴨為主的菜式中，我最愛便是吃北京填鴨，貪鴨皮肥美，入口香濃。呢款素烤鴨雖用魔芋、麵筋等製成，但皮脆肉嫩，入口帶香濃的燒烤醬料味，將鴨片及炒過的豆芽捲在春卷皮內吃，配搭新鮮，沒有填鴨的油膩感覺，多吃幾塊也無妨。
烏龍戲珠名字夠晒特別，單看菜名真的不知箇中奧秘，烏龍即是遼參，形容得果然貼切。這味鮑汁扣遼參，無論外形、口感都與真正遼參極度相似，問大廚先知原來海參是由魔芋製成，難怪炮製出來的海參帶點膠質質感，食落口有少少煙韌，大廚話此菜式所需的工夫較多，所以在眾多素食中，賣得較貴。
講到特別，我最鍾意就係呢款火火紅紅，話說有間東北人開的餐館，當火龍魚端上客人面前，服務員會唱一段帶祝福意味的順口溜，吃過後的人其生意便會蒸蒸日上、「火火紅紅」，因而這味火龍魚又名火火紅紅。魚塊用蛋白粉、菌菇膳食纖維和海藻類食品做成，加上糖醋與松仁，魚味鮮甜，肉感嫩滑，不過我最愛還是端上枱時，紅紅的火燄正燒着魚塊，夠晒暖笠笠。
無雞不歡的我，當然想試試素雞，好似呢碟素雞，賣相雖然唔算太逼真，不過我就欣賞大廚所做的雞頭。素雞其實用麵筋同蛋白製成，啖啖肉，口感帶點嚡，似十足雞胸肉。
登品素食府
地址：深圳市羅湖區寶安南路駿庭名園三樓
電話：（86)75525908588/25908788
營業時間：9:00am-10:00pm