由成龍、奧雲韋遜（OwenWilson）同新加坡女星范文芳領銜主演嗰套《贖金之王2：皇廷激戰》，前日啱啱喺荷李活舉行首映，三個主角自然着得靚靚咁出席。不過，范文芳前日着肚兜上陣，馮仁昭就覺得有啲熟口熟面，霎吓眼的確有啲似章子怡。
喺《贖金之王2》入面飾演成龍個妹嘅范文芳，佢除咗衣着品味同章子怡差唔多之外，同章子怡喺《火拼時速2》裏面一樣，都係喺電影度大賣功夫同性感，唯一唔同之處係范文芳英文好啲，發揮嘅機會可以話多啲！
另外，因為上次章子怡同成龍拍《火拼時速2》時，俾人影到餵成龍食提子，兩個人之後被傳關係曖昧。不過，范文芳就話佢同成龍絕對唔會過電，早排佢接受家鄉新加坡嘅傳媒訪問時，好強調佢同成龍之間只有兄妹情，而且佢已經有意中人。
噚日係譚耀文重投無綫後第一日開工，佢同蔣志光喺尖沙嘴嘅一間茶餐廳度拍新劇《美麗天使》。譚耀文一開工就收到一封兩蚊嘅開工利是，佢話自己過年放咗幾日假，但係都係留喺屋企睇劇本。譚耀文喺屋企排行最細，所以𢭃到幾千蚊利是，所以話做細嘅幾時都有着數。
翁虹腰傷痊愈後努力搵錢，𠵱家大部份時間喺內地工作，問佢會唔會考慮喺內地置業？佢話喺香港供咗十幾年樓，前前後後蝕咗八位數字，翁虹重講笑話曾經有半年時間患咗樓宇抑鬱症，佢話：「呢件事啟發咗我要謹慎，好在我嘅人都好樂觀，識得自我心理輔導，話畀自己聽重後生、重有機會，我梗係希望搵番失去嘅錢啦，不過最重要嘅都係健康，希望有類似我的經歷，喺金錢、健康上都遇到考驗嘅香港人，都識得積極去面對啦！」
張燊悅過年前同男友雷頌德雙雙出現機場，飛往外地度新歲，噚日燊悅終於返港，但唔見另一半影，不過都有個助手幫佢推行李。問佢去完邊度旅行？佢笑得好甜話：「唔知呢！」睇嚟佢過咗個好甜蜜嘅農曆新年。另外，知名嘅鋼琴家李雲迪噚日由日本飛嚟香港，佢話之後會去深圳，所以今次只係過境。
謝賢（四哥）噚日由加拿大返咗香港後，接受電台訪問，佢話霆鋒個嫲嫲為咗個孫，兩年嚟第一次出街食飯，點知都俾記者影到。佢重話：「我實唔會講佢（霆鋒）去邊啦！等佢散吓心，畀啲自由佢！佢係用屋企嘅秘密通道，通過隔籬屋走。總知佢去咗同朋友遊山玩水，同行有冇女朋友我就唔知，但係男性朋友一定有，當中有啲識，有啲唔識。」
節目主持訪問完四哥之後，話：「都係未瞓醒嘅四哥好啲，我今朝打畀佢，問佢霆鋒係咪去咗北京，四哥答：「嘩！…得啦！大家明白啦！」頭先問四哥霆鋒係咪喺中國，佢都唔講，叫大家自己估吓！
新春期間，電視劇《雪地裡的星星》嘅演員何潤東、邱澤、陳怡蓉同埋經理人公司新加盟嘅十歲小朋友沈建宏去咗北京，出席新年節目記者會，佢哋喺內地都好受歡迎，早前佢哋喺廣州搞記者會有好多影迷支持，一個內地知名嘅食品廣告商，好豪爽咁出咗幾千萬人民幣嘅廣告費，搵佢哋拍廣告，到時重會搞個大型記者會㖭！
