羊年第1日，港股紅盤未能高收，不過跌幅亦好細。藍籌股羊年第1家派全年成績表嘅，係東亞（023），盤數下周二出嚟見人，股價升45仙，收14.90元。估中東亞走勢嘅都冇法子喺窩輪身上搵銀，只因東亞得隻Call輪9191，上周已經因到期而無買賣。
東亞強勁，可能會成為銀行股回升嘅先鋒，滙豐（005）卒之因超賣，昨日反彈50仙，收82.75元，估計反彈個勢未完，滙豐Call輪9434昨日同類輪中最生猛，收21.1仙，升幅14%，打入10大威水榜內。睇滙豐繼續去，可以揀啲昨日冇乜郁嘅Call輪埋手，例如9545，隻輪收13.9仙，跌1%，早段曾見16仙，4月初夠鐘，溢價4.4%，槓桿率59.5倍。
美元兌日圓回升，兩件美元兌日圓Call輪9399同9420彈升40%同25%，急升之後追唔過，要等日圓升番再諗。
和黃（013）跌番40仙，和黃Call輪9518散27%，愈近末日，溢價愈縮，風險好大。和黃跌到咁上下，就有博反彈嘅吸引力，但揀Call輪要避開類似9518嘅貨色，可以諗吓9666，隻輪6月夠鐘，現價47仙，溢價7.4%，槓桿率10.3倍。吼住和黃下試48元之時，以43仙左右買9666，見反彈有利潤則收割。
章盛