丹麥大年初一禮讓伊朗一球十二碼，結果噚晚只能贏港聯得季軍，呢支咁有體育精神嘅球隊，大會就特別頒咗個公平競技獎畀佢哋。更榮幸係，賽會重邀請到丹麥王子約阿希姆（圖右一）作頒獎嘉賓，跌咗個橙但執番個柑，丹麥今年嚟香港算係咁啦。
港聯年初一輸波，有人歸咎一班老細級人馬當日冇派「利是」畀球員，令球隊士氣大挫。為咗闢謠，足總主席康寶駒同領隊許淇安，噚晚就特別攞住一叠大「利是」（成一千元一封），賽前親自走入更衣室派畀球員，希望振奮士氣咁話。
噚晚大球場打夜波，入場觀眾唔夠年初一多，加上主隊又入唔到決賽，班球迷睇波氣氛就真係好一般。球迷冇乜癮，一班在場賣雪糕、賣啤酒嘅小販重慘，因為天寒地凍，雪糕啤酒呢啲夏天食品唔滯銷就有鬼。