美伊之戰幾時打得成冇人知，但係兩隊電視台嘅採訪隊已經相繼返港。
有線高劍青佢哋噚日凌晨一點鐘由巴格達出發，先去安曼，再飛去杜拜，到下晝兩點幾返到香江，認真轉折。
阿青同八方講，今次採訪都算順利，但由於情勢日漸緊張，正如啲外交界前輩講，喺自己可控制下嘅情況收隊，好過狼狽地逃難，所以佢哋都聽話撤走。
至於無綫隊人，謝彩雲年初一已經喺八方嗰Call台報平安，嗰日八方去咗聽演唱會，聽唔到電話，初二聽到彩雲同佢先生嘅聲音，先放下心頭大石。
彩雲話今次再上前線採訪好興奮，佢重話入回教廟宇要包頭都係入鄉隨俗，唔係博出位。
啲行家笑無綫派兩女子打前鋒，而有線就出四個男子，十足係Twins對F4，阿青聽聞，開心到不得了。
傳真︰2623-9278
電郵︰