踏入羊年，容祖兒（Joey）與陳奕迅（Eason）日前齊往元朗玩羊仔。當日二人除親手餵山羊及鴕鳥食草外，又載羊仔坐家庭單車行大運，Eason更不怕污糟執羊屎，當場嚇窒Joey。而玩得興起的Eason，被鴕鳥偷襲時，竟忽然自爆「得番一粒」。
今日是大年初五，陳奕迅及容祖兒向大家拜年，恭祝各位三陽（羊）啟泰，新年進步。日前Eason及Joey應本報邀請，前往元朗大棠荔枝園的農場玩羊仔。
當日二人為拼湊出「三陽啟泰」的意思，與一頭大山羊及一白一黑的兩頭小山羊合照，但兩隻小羊卻不受控制，經常東奔西跑，Eason和Joey惟有將餵食用的草放在身上，引羊仔埋身。Eason更對山羊仔說：「我扮草呀，過嚟啦。」
不過待羊仔聽話後，又輪到忙於食草的大羊不肯入鏡，一大兩小的羊又不停拉屎，Eason忙於制服大羊之餘，竟不慎踩羊糞，Joey見狀即大叫：「Eason，你踩屎呀！」但Eason卻若無其事地答：「踩咪踩囉。」說罷更一手執起羊糞，當場嚇窒Joey，事後Eason還說：「我唔驚羊屎呀，臭嘅就驚啫，瑞士啲人攞羊屎做呔夾㖭呀。」
Joey對Eason的「壯舉」則說：「佢好勁呀，乜都唔驚嘅。」不過Eason自言亦有害怕的東西，問他是否最怕女友徐濠縈？他笑說：「有啲啦，但我最驚係有毛蜘蛛同蛇，你唔會知啲蛇諗乜㗎。」
其後二人又一同乘坐家庭單車載山羊仔行大運，園內的工作人員笑言要二人為三頭山羊改名，Eason就將大山羊取名「咩都好」，Joey則替白羊仔命名為「咩咩咩」，黑羊仔就叫「啤啤啤」。
Joey與Eason玩完羊後，又往餵豬及餵鴕鳥，其中一隻鴕鳥總愛挨向Eason的下體，Eason竟說：「喂，我已經得番一粒㗎啦，重搞？」未幾Eason又發現園內有一堆鴕鳥蛋，但卻因氣候問題不能孵出，園內負責人便分贈二人兩隻蛋留念，令Eason非常開心，他說：「隻蛋好靚，好藝術，我會擺喺屋企。」而Joey就說：「我會試下孵佢出嚟，如果孵到嘅話，就放隻鴕鳥喺天台養。」
談到新年願望，Eason說：「希望大家留番啲錢買書，起碼有教育意義，唔好用嚟買子彈，打仗令大家好驚。」而Joey則說：「希望家人身體健康，工作順利。」
採訪：朱芷瑩
攝影：林德雄
場地提供：元朗大棠荔枝園
