港股果然紅盤高開，可惜好快就被期指拖低，尾市雖有反彈，恒指收報9252，仍跌6點，好友未免有啲失望。
恒指昨日一開市就裂口彈上9331，趙飛雲預咗個市彈力有限，諗住等指數升多幾十點，就買恒指Put輪9587，點知期指好快就拖住現貨跌，到中午恒指已經倒跌。趙飛雲趕唔到上車，惟有眼光光睇住隻9587由低位0.201元殺上0.229元。
不過，期指下晝3時過後急彈，由最多跌87點收窄到收市只跌7點，而且由大低水變成幾乎平水，走勢似乎又唔係太差。畢竟港股已見超賣，恒指短期在8900-9131裂口區附近會有一定支持。故此趙飛雲維持原有策略，等恒指升上9400水平先至買9587，以免追錯貴貨。
大笨象滙豐（005）昨日升5毫，收82.75元，畀多些少耐性，等佢彈上84元左右，先至按策略買滙豐Put輪9588。
昨日提過嘅兩隻股仔僑雄（381）同意科（943），表現不俗。
僑雄收報0.28元，大升近13%，可惜交投疏，趙飛雲唔想跳價追貨，結果冇上車。市後聽老友講，呢隻玩具股有「哈里波特概念」，幕後惜貨，故此成交唔多。
意科昨日收市報0.208元，升4%，交投相對多啲，趙飛雲臨收市買咗些少。老友報料話，公司將有好消息公布，股價有機會升兩成以上，以0.195元止蝕即可。
趙飛雲