響剛過去嘅年初三（2月3日），日產汽車響日本本土推出全新Teana車系，並以豪華房車市場為針對目標；新車造型獨特吸引之餘，豪華車廂布局及多個引擎配搭亦為賣點之一。雖然未知Teana會否在港推出，不如就趁今日一齊嚟先睹為快，睇吓佢有幾吸引啦！
記者：鄭達基
與造型一樣，車廂布局亦要來得甚具氣派，除空間寬敞闊落外，車內座椅亦見有高承托力，乘坐倍見貼服舒適；就連車廂設備亦見齊全，除備有前排伸縮腿墊，以及中控台上嘅恒溫冷氣及高級音響組合外，後排重備有冷氣送風口、中央手枕等等，可謂享受至高。同時，Teana不單止擁有一個堅固嘅車架結構外，而且重備有多個安全氣袋及側氣袋配搭，以保障車上乘客安全呢！
廠方為選擇Teana嘅用家，提供有多個引擎配搭，當中包括有2.3公升V6（馬力173匹）、2.5公升直4（馬力160匹），同埋3.5公升V6（馬力231匹）型號作選擇，輔以一套4前速自動波，又或者係只配用於3.5公升版本身上嘅Xtronic6前速CVT波箱，都能夠令新車有出色嘅性能表現㗎！
全新日產Teana擁有一個成熟富豪邁氣派嘅造型，不單止能夠迎合行政人員嘅身份外，略帶點同廠Skyline車系影子嘅車首設計，亦見有一份吸引力；就連車尾一組尾燈嘅鋪排亦見簡潔易讀，從而令尾隨駕駛者更能掌握你嘅去向呢！